Zabbuli 81 - Baibuli Ekibono kya Katonda 2014

Obulungi bwa Katonda n'obudheemu bw'omuntu

¹ Mwembere ghaigulu olwembo olusaaka Katonda oyo amaani gaife; mumukubire emizira oyo Katonda wa Yakobo.

² Mutoolere olwembo, ow'obugoma ateeku, memale ow'endingidi ewooma n'ow'entongooli beeyimbe okwo.

³ Mufuuwe eigwala ku Kibinuko eky'Okuboneka kw'Omwezi, ni ku lunaku lwe gutyaime ku ntebe.

⁴ Ekyo kya iteeka mu Isiraeli, era kiragiro kya Katonda wa Yakobo.

⁵ Eiteeka eryo yaliragira abantu ng'abita mu Yosefu, bweyaja okutanula olutalo ku Bamisiri. Mpulira amamiro g'omuntu ye ntaidhi nga gakoba gati:

Obudheemu

⁶ “Nabatwikula emigugu naabawonia okubbeedanga ebizito.

⁷ Bwe mwali mu buzibu mwansaba, era naabawonia, naabairamu nga neegisiisa mu kire eky'amaadhi n'olukuba, naabaleba nga muli ku maadhi ag'e Meriba.

⁸ Imwe abantu bange, mumpulire nga ndi kubalamba; iwe Isiraeli, ngoli ompulirisa kyandibaire kikalamu.

⁹ Mutasinzanga katonda wundi okutoolaku nze Katonda zenka; mutakubiranga makiryaivu misambwa egisinzibwa abamaghanga agandi.

¹⁰ Ninze Musengwa Katonda waimwe, eyabatoola mu nsi ey'e Misiri. Bwe mwasama ndidha kubaliisa mwigute.

¹¹ Aye abantu bange baaloba okumpulira! Isiraeli yaaloba okukolagana ninze!

¹² Kale n'okubaleka bajiire ku ebyo emyoyo gyaibwe emidheemu bye gibalagira, beebise nga beene bwebalowooza.

¹³ Kale ngoli abantu bange bampulira; kale ngoli Isiraeli ajiira ku bye mmukoba,

¹⁴ nandyangwighe okulwanisa abazigu baibwe, naaghangula abo ababakyagha.

¹⁵ Abo abankyagha nze Musengwa Katonda, bandiidhye ye ndi nga baavula bwavule, naababonereza ebyanda n'ebyanda.

¹⁶ Aye imwe nandibaliisiisa engaano esinga bulungi, naabaigusa omudheenene ogw'endhuki ogw'omu nsiko.”