Zabbuli 80 - Baibuli Ekibono kya Katonda 2014

Okusaba okw'ensi ebaire mu ntalo

¹ Wo Katonda tukusaba otuwulirise, iwe alabirira abantu ba Isiraeli ng'oti n'omwayi ow'entaama, era n'okuuma aba Yosefu ng'oti byayo byo. Iwe ali ku kityamo kyo eky'obwakyabazinga ekiri ku bitonde eby'amaghagha ebyetebwa bikerubi,

² weeyolekere abantu ba Efuraimu, n'aba Benjamini, n'aba Manasse. Situka n'amaani go oidhe otulokole.

³ Wo Katonda waife, twirizeegho ensi yaife nga bwe yali. Tulingeku n'amaiso ag'ekisa era otulokole.

⁴ Wo Musengwa Katonda Afuga Amagye, mbo onaasungughalira okusaba okw'abantu bo kutuuka li?

⁵ Mu kifo ky'emere otuleetera nnaku, mu kifo ky'amaadhi otugha kikopo kiidhuvu eky'amaziga.

⁶ Oleka amaghanga agatuliiraine gaalwanira eitaka lyaife, abazigu baife baatusekerera.

⁷ Wo Katonda Afuga Amagye, twirizeegho ensi yaife nga bwe yali. Tulingeku n'ekisa era otulokole.

⁸ Watuleeta ng'omuzabbibu okuva mu Misiri, waabinga amaghanga agaali mu nsi eno, waagusimbamu.

⁹ Waagulimaku, gwasimba emizi, gwabuna ensi.

¹⁰ Ekinsense kyagwo kyaghemba ensozi, ensaga dhaagwo dhaaghemba n'emivule emikologho.

¹¹ Ensaga dhaagwo dhaaja dhaatuuka ku Nhandha Eyaghagati, era dhaatuuka ni ku mwiga Eufurate.

¹² Kale lwaki wamenha olugo lwe wagusitaku, n'oleka kiisi abitagho okunoga ebibala byagwo?

¹³ Embiidhi edh'omu nsiko dhaagutyankirira, na kiisi kya mu nsiko kyonakyona kyeriira okwo.

¹⁴ Wo Katonda Afuga Amagye, kyusaamuuku. Ng'oli eyo mu igulu, linga ghansi otubone; labirira omuzabbibu guno,

¹⁵ gwe wasimba iwe mwene, n'ogukuza nga gwa maani.

¹⁶ Abazigu baife baagutema baagutaaku n'omuliro; bagwananga baazikirira ng'obalingiriire okubasalira omusango.

¹⁷ Aye kuuma abantu bo be weerondera, olabirire eighanga lye wafuula ery'amaani.

¹⁸ Tituja kwirayo kudaaliima kukuleka; tughe obulamu twidha kukusaakanga.

¹⁹ Wo Musengwa Katonda Afuga Amagye, twirizeegho ensi yaife nga bwe yali. Tulingeku n'amaiso ag'ekisa era otulokole.