Zabbuli 79 - Baibuli Ekibono kya Katonda 2014

Okusabira eighanga eryalumbibwa abazigu

¹ Wo Katonda, abantu abatakutya bakwingiriire mu nsi yo, baayonoona eisinzizo lyo eitukuvu, baaleka ekibuga Yerusalemu nga bakizikiriiza.

² Emirambo egy'abagheereza bo bagirekeire nhonhi kulya, emirambo egy'abantu bo abakutya baagigabwire nsolo dha mu nsiko.

³ Bayuye omusaayi gw'abantu bo ng'oti n'abayugha amaadhi obuudhi, gwakuuluula ng'oti maadhi mu Yerusalemu mwonamwona, ghaaloba kusigalagho waire omuntu omulala aziika abafu.

⁴ Tufuuse ekivume eri amaghanga agatuliiraine, era batuyeeyereza bwe batusekerera.

⁵ Wo Musengwa Katonda, oja kutusungughalira kutuusa li? Byanda na byanda? Enkikidi y'oli nayo olw'abantu bo eneeyongera kwaka bwake ng'oti muliro?

⁶ Kyukiza obusungu bwo ku maghanga agatakutya, ni ku bwakyabazinga obutakusinza;

⁷ kuba bamazeegho abantu bo okwita, baaleetera ensi yo okufafaagana.

⁸ Otatubonereza lwa bibi bya badhaadha baife, aye yangughaku otwoleke okusaasira kwo, kuba tuwoiremu amaani.

⁹ Wo Katonda waife omuzaawuzi, tubeere ku lw'ekitiisa eky'eriina lyo, otuwonie era otusonighe ebibi byaife, ku lw'obulungi obw'eriina lyo.

¹⁰ Lwaki oleka amaghanga okutubuuza gati: “Memale Katonda waimwe ali gha?” Iwe beesasuulizeeku nga tubona, olw'omusaayi ogw'abagheereza bo be baita n'amaghanga goonagoona gakimanhe.

¹¹ Wulirisa okusinda kw'abasibe, okozese obuyinza bwo owonie abo abasalirwa ogw'okufa.

¹² Weesasuulize ku maghanga ago agatuliiraine emikuzi musanvu, olw'okukuyeeyereza kwonakwona kwe babairenga bakola.

¹³ Olwo ife abantu bo, entaama dho dh'oyaya, twidha kukusiimanga ebyanda n'ebyanda, era tukusaakenga mu nse n'ense.