Zabbuli 78 - Baibuli Ekibono kya Katonda 2014

Katonda n'abantu be Abaisiraeli

¹ Bantu bange, mutege kutu muwulire bye mbeegeresa; mwetegereze kiisi kibono kye mbakoba.

² Ndidha kwogera mu nfumo; ndidha kwatula ebitaatulwanga eby'eira,

³ badhaadha baife bye batukobera, ni tubiwulira era ni tubyega.

⁴ Tituja kubigisa baana baife, tuja kukobera abo ab'oluse olwidha, eby'amaani Musengwa Katonda bye yakola ebimuleetera okusaakibwa, n'ebyewuunhisa bye yakola.

⁵ Yateeragho abantu ba Isiraeli amateeka, yaateeragho baidhukulu ba Yakobo ebiragiro yaakoba badhaadha baife beegeresenga ebyo abaana baibwe.

⁶ Olwo kiisi luse olwiragho, n'abaana abakaali kuzaalibwa, basobole okubimanha era boona babikobere abaana baibwe.

⁷ Memale olwo batenga obwesige bwaibwe mu Katonda, nga tibeerabira bye yakola, aye nga bagondera ebiragiro bye.

⁸ Balobe kuba ng'oti ni badhaadha baibwe, ab'oluse olw'empwitu era oludheemu oluse olw'abantu ab'emyoyo egitaagumira ku Katonda era abaalekera agho okumwikiriza.

⁹ Aba Efuraimu nga bagemye obulaso ku lunaku olw'olutalo, baakyuka baalumuka abazigu.

¹⁰ Tibaakuuma ndagaano yaibwe ni Katonda era baaloba okugondera amateeka ge.

¹¹ Beerabira bye yakola, waire ebyewuunhio mwene bye yakola nga babona.

¹² Katonda yakola ebyewuunhio nga badhaadha baibwe babona bati bye yakolera eyo mu biketezo eby'e Zoani mu nsi Misiri.

¹³ Yagabaniamu amaadhi g'enhandha ghabiri, yaageemereza ng'oti bimante eruuyi n'eruuyi yaabaleka baagabitamu ghagati.

¹⁴ Omusana yaboolekanga engira ng'akozesa ekire ekyabakulemberangamu ate obwire yaagibooleka n'ekintu ekyaka ng'oti muliro.

¹⁵ Yayatisa embaale mu irungu, yaabafunira amaadhi ag'okunhwa kamaala ng'agava ku ntobo y'enhandha.

¹⁶ Yakola emiiga gyakuuluula okuva mu lubaale yaaleetera amaadhi okukuuluula ng'oti mwiga gwene.

¹⁷ Aye ate baaja bwa mu maiso n'okwonoona y'ali baamudheemera eyo mu irungu, oyo Ali Ghaigulu Yeene.

¹⁸ Baaleba Katonda mu bugenderevu nga bamusaba emere olw'amairu gaibwe.

¹⁹ Baayogera bubi ku Katonda, bati: “Katonda asobola okutufunira emere mu irungu?

²⁰ Kituufu yakuba olubaale mwavaamu amaadhi gaatiiriika, n'emiiga gyakuuluula, gyabanda n'okubanda aye asobola okutufunira emere, oba okutufunira emamba ife abantu be?”

²¹ Kale Musengwa Katonda bweyawulira ebyo yaidhula ekiruyi, yaalumba abantu be ng'ali ng'oti muliro era obusungu bwe bweyongera okubaakiraku

²² kuba tibamwikiriza, waire okwesiga amaani ge agawonia.

²³ Ng'ate yagha ekiragiro ghaigulu ku igulu, yaigulagho emiryango gy'eigulu

²⁴ mannu yaamagalika, baalya empeke dheene edhiva mu igulu dhe yabagha.

²⁵ Katonda yaagha abantu emere baalya baalekerera abantu baalya ku mere ya bamalaika.

²⁶ Kabiri yaafuuyisa empewo ku igulu eva e buvandhuba era olw'obukumu bwe yaafuuyisa n'empewo eyindi eva ku luuyi olw'omukono omusaadha olw'e buvandhuba.

²⁷ Olwo emamba yaamagalika enhonhi dheene enhingi ng'oti musenho gwa ku nhandha.

²⁸ Dhaamagalika munda mu kifo ghe baasimba weema dhaibwe, okwezungulula kiisi weema ya buli muntu.

²⁹ Abantu baalya era baiguta, kuba yabagha ng'amairu gaibwe bwe gaali.

³⁰ Aye amairu gaali gakaali kubawaamu, era nga bakaalya,

³¹ Katonda yaabasungughalira, yaitamu abasaadha abaali basingamu amaani abasaadha aba Isiraeli abaalondebwa n'obwegendereza.

³² Aye waire ng'ebyo byonabyona byali bityo, baaja bwa mu maiso na kwonoona era waire nga baabona ebyewuunhio bye, tibaamwikiriza.

³³ Kyeyava n'aleetera enaku dhaibwe okuwaagho amangu ng'oti muuka gwa mu nhindo n'enkomerero y'emyaka gyaibwe n'eba ya kikutuko.

³⁴ Bwe yabaitamu banaibwe atyo, abaasigalagho baakyuka baira y'ali beenenia, baatoolera okumusinza n'omwoyo mulala.

³⁵ Baidhukira nga Katonda n'abakuuma era baidhukira ng'oyo Ali Ghaigulu Yeene n'abanunula.

³⁶ Aye ebibono byaibwe byali bya kumusuutiriza busuutirize na munwa, nga bye boogera buguya bwereere.

³⁷ Baali nga tibasobola kugumira ku Katonda, era nga tibatuukiriza ebyo ebiri mu ndagaano ye.

³⁸ Aye Katonda olw'okuba n'okusaasira okungi einho, yaabasonigha okwonoona kwaibwe, yaaloba kubazikiriza kubamalagho. Emikuzi kamaala ng'afuga obusungu, yaamira ekiruyi kye

³⁹ ng'aidhukira bwe bali abantu obuntu abafa, abali ng'oti mpewo efuuwa n'ebulagho.

⁴⁰ Emikuzi kamaala baamudheemeranga eyo mu irungu baamusungughazanga inho.

⁴¹ Baamulebanga emikuzi kamaala, baamusonsoonia Oyo Omutukuvu wa Isiraeli.

⁴² Beerabira obuyinza bw'ali nabwo beerabira n'olunaku lwe yabawonia abazigu baibwe,

⁴³ ng'akola eby'amaani era n'ebyewuunhio, eyo mu biketezo eby'e Zoani mu nsi Misiri.

⁴⁴ Yafuusa amaadhi ag'omu miiga gyaibwe gaafuuka musaayi Abamisiri baabula amaadhi ag'okunhwa.

⁴⁵ Yabasindikira ebikuukuulu by'ensowera ebyabaluma ni bibadaazadaaza, n'ebikere ebyaitaitana ensi yaibwe.

⁴⁶ Yaasindika ebisiisa mu nimiro dhaibwe, byalya ebirime ebyava mu maani gaibwe.

⁴⁷ Yazikiriza emizabbibu gyaibwe n'omugozi, era yaazikiriza emitiini gyaibwe emisikamore n'ekiinhogogo.

⁴⁸ Yaita ente dhaibwe n'omugozi yaita n'ebyayo byaibwe ebindi n'olukuba.

⁴⁹ Abantu abo yabamaliraku obusungu bwe nga yeesiniirwa ekibitiriire. Obusungu bwe obwo bwali ng'oti n'ekikunsu kya bamalaika be, abazikiriza.

⁵⁰ Tiyalobera busungu bwe kubaakiraku waire okubasaasira balobe kufa, aye yabasindikira kawumpuli yaabaita.

⁵¹ Katonda yaita abaana ab'Abamisiri abalenzi ababeri boonaboona, ab'amaani, abasooka mu kiisi ndhu ya Hamu.

⁵² Agho yaakulemberamu abantu be okubatoola mu Misiri ng'omwayi bw'akulemberamu entaama dhe, yaababisa mu irungu ng'omwayi bw'atambuza ebyayo bye.

⁵³ Yabatambuza n'emiraala nga bazira kye batya mu ngira. Aye abazigu baibwe enhandha yaabamira baafa.

⁵⁴ Agho yaabatuusa mu nsi ye entukuvu ku lusozi mwene lwe yabingaku abantu n'amaani ge.

⁵⁵ Kiisi ghe baatuukanga, yaabingangagho abatyamye baagho ensi yaibwe yaagigabania mu bika bya Isiraeli, n'amaka gaibwe yaagagha abantu be Abaisiraeli.

⁵⁶ Aye baaleba Katonda era baamudheemera oyo Ali Ghaigulu Yeene baaloba kugondera biragiro bye,

⁵⁷ baamughemukira ng'oti ni badhaadha baibwe bwe baalekera okuba abeesigwa nga tibeesigika ng'oti n'akalaso akeghetamu.

⁵⁸ Basonsoonia Katonda baamusungughaza olw'ebifo byaibwe ebigulumivu bye baasinzizangamu era baamuleetera okuba n'enkikidi olw'ebifaananie ebibaadhe bye baasinzanga.

⁵⁹ Katonda bwe yabona ebyo yaidhula ekiruyi, era yaabatooleraku irala omwoyo.

⁶⁰ Yaalekulira agho weema ye eyali mu Shilo mwe yabanga ng'ali mu bantu be abo.

⁶¹ Yaaleka abazigu baanhaga Sanduuku y'Endagaano akamanhiso ke ak'obukumu n'ekitiisa.

⁶² Yasungughalira abantu abo ababe ku bubwe, yaaleka abazigu baibwe baabaita.

⁶³ Olutalo lwabalyaku abaana baibwe abaakaisuka, era abaguna baibwe baabula ab'okubabayiza.

⁶⁴ Bakabona baibwe baabaita n'empiima, era banamwandu baibwe baabalobera okubalira.

⁶⁵ Agho Musengwa Katonda yaazuuka ng'oti n'ava mu ndoolo, era ng'oti n'omuntu ow'amaani asuuyiriire olw'okunhwa omwenge ogw'emizabbibu.

⁶⁶ Yairirizaayo abazigu be ng'abaghangwire era nga baswaliire irala.

⁶⁷ Yaaboola baidhukulu ba Yosefu, yaaloba kulonda kika kya Efuraimu

⁶⁸ aye yaalonda ekika kya Yuda, n'olusozi Sioni lw'agonza einho.

⁶⁹ Okwo kwe yazimba eisinzizo lye eireeyi okutuuka ku igulu yaaligumya ng'oti n'ensi etawaagho ebyanda n'ebyanda.

⁷⁰ Yalonda omugheereza we Daudi, yaamutoola mu byayiro eby'entaama,

⁷¹ eyo ye yalinga ng'ayaya entaama edhonsa yaamuleeta alabirirenga abantu ba Katonda Abaisiraeli.

⁷² Era Daudi oyo yeeghaayo okubalabirira n'omwoyo mulala, ng'abafuga n'amagezi.