Zabbuli 77 - Baibuli Ekibono kya Katonda 2014

Okusaba okw'omu biseera ebizibu

¹ Ndirira Katonda; mmulirira nga nhenda ampulirise.

² Bwemba mu bizibu nsaba Musengwa Katonda; obwire bwonabwona mpanika amakono gange nga tiwulira na kuluyirira, aye naabulwa ansaasiraku.

³ Bwendowooza ku Katonda ndira bwa maziga; bweneefumintiriza einho n'amaani gampwamu, naazirika.

⁴ Obwire bwonabwona tanganha kutenduka ku ndoolo naire; ndi mweraliikirivu tisobola na kwogera.

⁵ Ndowooza ku biseera eby'eira, naidhukira emyaka egyabita.

⁶ Nkyesa obwire ng'ebidhuubo biri kwekuluumulula mu mwoyo gwange. Neefumintiriza era neebuuza mule nti:

⁷ “Mbo Musengwa Katonda anaatusuula ere yaatwerabirira irala? Taliirayo kutusiima naire?

⁸ Yalekera agho okutugonza? Ekisuubizo kye tikikaaligho?

⁹ Katonda takaali na kivunika naire? Obusungu n'obumuleeteire okulekera okutusaasira?”

¹⁰ Agho naakoba nti: “Ekisinga okuunuma, n'okubona ng'oyo Ali Ghaigulu Yeene takaali ku luuyi lwaife.”

¹¹ Ndidha kulowoozanga ku ebyo Musengwa Katonda by'akola; ndidhukirenga n'ebyewuunhio bye yakolanga eira.

¹² Ndidha kwetegerezanga emirimo gye yakola; neefumintirizenga ku by'amaani bye yakola.

¹³ Wo Katonda, kiisi ky'okola kitukuvu, ezirayo katonda mukologho kwaga ni Katonda waife.

¹⁴ Niiwe Katonda akola ebyewuunhio, era wayoleka amaghanga ebikolwa byo eby'amaani.

¹⁵ Wakozesa amaani go, waatoola abantu bo mu bwiru, abo baidhukulu ba Yakobo ni Yosefu.

¹⁶ Amaadhi bwe gaakubona iwe Katonda, amaadhi ago olwakubona gati, gaatya, bwenebwene entobo y'enhandha yatengeeta.

¹⁷ Ebire byayugha amaadhi, ku igulu kwavaaku olukuba, obulaso bwo bwamyansa okuva ku buli luuyi.

¹⁸ Olukuba lwo lwatyabuka mu kiwunga nga luvuga ng'oti nkede ya kigaali, okumyansa kwamulisa ensi yoonayoona, ensi yaatengeeta era yeesunda.

¹⁹ Watambula ku nhandha, waakola akagira ku maadhi amangi, aye ebigere mw'obise byaloba kuboneka.

²⁰ Wabisa abantu bo ku maadhi ng'omwayi bw'atambuza ebyayo bye, ng'okozesa Musa ni Aaroni.