Zabbuli 76 - Baibuli Ekibono kya Katonda 2014

Katonda omughanguzi

¹ Katonda amanhiibwa mu Buyudaaya; eriina lye ligheebwa ekitiisa mu Isiraeli.

² Katonda aba Yerusalemu ku lusozi Sioni.

³ Eyo ye yamenheramenhera obulaso obuziinhuuka, n'engabo n'empiima n'eby'okulwanisa ebindi abazigu be bye baakozesanga mu kulwana olutalo.

⁴ Ekitiisa kye kimesunkana, era atambula ng'akaadha, bw'aba ng'ava mu nsozi ye yaghangulira abazigu be.

⁵ Abalwani baibwe abaziramu ntete baabasuuza byonabyona bye baali nabyo. Era buti bali mu ndoolo dhire dheene edh'okufa. Amaani gaibwe n'obumanhi bwaibwe mu by'okulwana entalo tibyabagasa.

⁶ Bwe wabakaabukira iwe Katonda wa Yakobo, embalaasi dhaagwa, n'abavuzi baadho baagwa ghansi, baafa.

⁷ Wo Musengwa Katonda, ghazira atakutya, ghazira akana n'asigala agho mu maiso go, bw'oba ng'osungughaire.

⁸ Waba mu igulu waalangirira ensala yo, ensi yaatya era yaasiriikirira,

⁹ iwe ng'ositwike okukoba kye wasalagho, okulokola abo boonaboona abadaazibwadaazibwa abali ku nsi.

¹⁰ Iwe oleetera obusungu obw'abantu okukusaaka obusaake, abo abaliwonagho mu ntalo balikusinza ku nnaku dho edh'ebibinuko.

¹¹ Imwe abantu mutuukirize eri Musengwa Katonda, oyo Katonda waimwe ebyo bye mweyama; imwe abali mu biketezo ebimwezungulwire mwenamwena mumutonere ebirabo, oyo atiibwa abantu boonaboona.

¹² Abafuzi abamalamu emyoyo, era bakyabazinga abali ku nsi abatiikiza irala baatenha.