Zabbuli 75 - Baibuli Ekibono kya Katonda 2014

Okusaaka Katonda asalira ensi omusango

¹ Wo Katonda waife, tusiimye inho, tusiimiire irala! Tusaaka eriina lyo nga tuloodha ebyewuunhisa kamaala by'okola.

² Katonda akoba oti: “Nataagho ekiseera eky'okusaliramu emisango, nja kusala nga nziramu kyekubira.”

³ Era akoba oti: “Waire ensi etengeeta, n'ebigirimu byonabyona ni bitengera, nze ndidha kugumya emisingi gyayo.

⁴ Nkoba abo abeekuluntaza nti mulekere okwekuluntaza; naakoba abakozi b'ebibi nti mulekere kwebona nga muli ba ghaigulu.

⁵ Mulobe kwekulumbaza, waire okwogera nga mumadalaiza emitwe.”

⁶ Omuntu okusalirwa omusango, tikiva buvandhuba oba bugwandhuba, waire okuva mu irungu.

⁷ Katonda mwene n'asala omusango owundi gwamusinga ate owundi yagusinga.

⁸ Katonda agemereire mu ngalo ekikopo eky'omwenge ogw'emizabbibu omuka ogw'obusungu bwe. Aja kugufukira ababi ab'oku nsi boonaboona, bagunhwe gwonagwona okutuuka ni ku iseedha.

⁹ Aye nze ndidha kusagambanga ebyanda n'ebyanda, era ndidha kwembanga enhembo edhisaaka Katonda wa Yakobo.

¹⁰ Amaani ag'ababi goonagoona aligazikiriza, ate amaani ag'abatuufu aligongeraku obungi.