Zabbuli 74 - Baibuli Ekibono kya Katonda 2014

Okusabira eighanga liwone abazigu

¹ Wo Katonda, lwaki otuswire ere n'otwerabira ebyanda n'ebyanda? Lwaki otusungughaliire ife entaama dho dh'oyaya?

² Idhukira abantu bo be weerondera eira, be watoola mu bwiru, babe eighanga eriryo ku bubwo. Idhukira olusozi Sioni kwe wabanga.

³ Tambula mu kyanhe aghaali eisinzizo, abazigu baife lye baazikiriza ni lisaanagho n'ebyalimu.

⁴ Abazigu baayasiikana mu kifo kyo ekitukuvu nga beesuuta olw'obughanguzi; era baasimbamu ebendera dhaibwe ng'obumanhiso obw'obughanguzi.

⁵ Baaba ng'oti n'abatemi b'emiti abagemye empasa okutema emiti mu kibira.

⁶ Baamenhamenha ebibaadhe eby'emiti, nga bakozesa empasa n'enhundo.

⁷ Eisinzizo lyo baalikumaku omuliro baalizikiriza, baayonoona ekifo kyo ekitukuvu abantu ghe bakusinziza.

⁸ Baagenderera okututyama ku mitwe batughangulire irala, era baidha mu nsi yaife baayokya ebifo ebitukuvu byonabyona mwe tusinziza Katonda.

⁹ Titukaabona bumanhiso bwaife obutukuvu, abalanzi baawaagho ira era ghazira aidhi bino ghe birikoma.

¹⁰ Wo Katonda, abazigu baife balituusa li okukusekerera? Obwo baja kuvumanga eriina lyo byanda na byanda?

¹¹ Lwaki oloba okutuyamba ng'ate tuli mu bwetaavu? Lwaki otulingirira obulingirire n'ozingira bwa makono?

¹² Ate nga iwe Katonda waife, okuva eira n'eira oli Kyabazinga waife; otulokoire emikuzi kamaala.

¹³ Enhandha wagigabaniamu ghabiri n'amaani go, waakonkona emitwe egy'agasota ag'omu maadhi.

¹⁴ Wakonkona emitwe egy'ogusota ogwetebwa Leviathani, omulambo gwagwo waagugha ebisolo eby'omu irungu ng'emere.

¹⁵ Wayatisa entanda mwavaamu enhindo dh'ensulo n'obwiga; ate waakaliiza emiiga egitakaliirangaku.

¹⁶ Omusana n'obwire byombi bibyo; niiwe owataagho endhuba n'omwezi mu bifo byabyo.

¹⁷ Niiwe owataagho ensalosalo ku ndhuyi dhoonadhoona edh'ensi, era wataagho endoboozi n'ebiseera eby'ekiinhogogo.

¹⁸ Aye Musengwa Katonda oteerabira kino nti abazigu bo bakusekerera, abantu abatakutya baakunhooma.

¹⁹ Otalekulira bantu bo mu makono ga bazigu baibwe; oteerabira bulamu bwa bantu bo abadaazibwadaazibwa.

²⁰ Idhukira endagaano ye wakola n'ife, kuba kiisi ghali nzikiiza ku nsi ghaidhwire ebikolwa eby'obukambwe.

²¹ Otaganha abo abazira bwogerero kuswazibwa; yamba abaavu n'abali mu bwetaavu basobole okusaaka eriina lyo.

²² Wo Katonda, situkiramu oyoleke nga bw'oli omutuufu. Oteerabira abantu abatakutya bwe bakusekerera omusana n'obwire.

²³ Oteerabira kukaabuka kw'abo abakukyagha, n'okuboigoka okw'abazigu bo okutakoma.