Zabbuli 73 - Baibuli Ekibono kya Katonda 2014

Ekitabo ekyokusatu Zab 73—89 Katonda asala mu butuufu

¹ Bwenebwene Katonda mulungi eri Abaisiraeli, n'eri abo abamuwulira n'omwoyo omulala.

² Aye nze neekontola kata ngwe; ebigere byange kumpi bityerere,

³ kuba bwe nabona ng'ababi ebintu bibajiira bukalamu, naabasaalirirwa olw'okwekuluntaza kwaibwe.

⁴ Bazira kibaluma naire; emibiri gyaibwe miramu bukalamu era gya maani.

⁵ Bazira bizibu ng'abantu abandi bwebaba nabyo; bazira nnaku ebaluma oba ekintu kyonakyona ekibamalaku emiraala.

⁶ Kyova okwekuluntaza kwaibwe kuboneekerera ng'oti n'ebinhere eby'omu nkoto, n'ebikolwa byaibwe eby'obukambwe ni bibabwikirira ng'oti kivaalo.

⁷ Bageedhie n'amaiso gaabafunduka, emyoyo gyaibwe gyaidhula okwenda okukola ebibi.

⁸ Boogera ku bantu abandi nga banhoomerera, nga benda okubakola obubi. Olw'okwekuluntaza kwaibwe beesoomera okukiriga bantu banaibwe.

⁹ Boogera ebivuma Katonda mwene igulu n'eminwa gyaibwe gyene, baakozesa enimi dhaibwe okutontogola ab'oku nsi.

¹⁰ Kyova abantu ba Katonda bakyukira ye bali ni babasaaka era ni baganha okuwulirisa kiisi kye babakoba.

¹¹ Beebuuza bati: “Aye Katonda alimanha atya? Oyo Ali Ghaigulu Yeene alisobola atya okutegeera?”

¹² Ababi batyo bwe bali, baba n'ebintu kamaala ate beeyongera okufuniraku ebindi.

¹³ Aye nze ndaagiire bwereere okwekuuma obutagwa mu bibi.

¹⁴ Ndaazibwadaazibwa okugwisa endhuba, naabonerezebwa buli nkyo.

¹⁵ Ngoli nakoba nti ka ndhogere ng'oti n'abo, nandibaire nkoze ng'oti n'atali wa mu bantu bo.

¹⁶ Bwe nalowooza einho ku kintu ekyo, kyanema okutegeera,

¹⁷ okutuusa bwe naja mu kifo kya Katonda ekitukuvu, memale olwo naategeera ebija okutuuka ku babi.

¹⁸ Bwenebwene iwe obata aghali obutyerezi, waabaleetera okugwa baazikirira.

¹⁹ Tibalwagho naire kuzikirira, kutemya na kuzibula, ng'entiisa ebeeyaagho.

²⁰ Ng'ekirooto bwe kyerabirwa ng'omuntu asitwike, n'iwe Musengwa Katonda weena otyo bw'obeerabira amangu, ng'otooleire okukola ebibyo.

²¹ Nawuliranga okulumwa munda mule, ng'ekintu kinfumita ku mwoyo.

²² Nali musiru era nga nzira kye ndidhi, nga y'oli neebisa ng'oti ndi nsolo busolo.

²³ Aye nga kwo okuba, nze ndi n'iwe buliidho era ongemereire n'omukono gwo.

²⁴ Ntambula nga njiira ku kugalaga kwo era ku nkomerero oliinanhiriza mu kitiisa.

²⁵ Eyo mu igulu nzirayo wundi ali ku lwange okutoolaku iwe era ni ku nsi kuzira kye neetaaga okutoolaku iwe.

²⁶ Waire omubiri gwange n'omwoyo binafugha, Katonda n'amaani gange era oyo n'omugabo gwange ebyanda n'ebyanda.

²⁷ Abo abakuvaaku baja kuzikirira, oja kumalagho abo abadaaliima.

²⁸ Aye nze nkibona nga kikalamu inho okuba ni Katonda, era nasalagho Musengwa Katonda abe omukuumi wange, olwo nkoberenga abantu byonabyona by'akola.