Zabbuli 72 - Baibuli Ekibono kya Katonda 2014

Okusabira kyabazinga

¹ Wo Katonda, gha kyabazinga okusala emisango mu butuufu bwo; era oghe omulangira oyo okutuukirira ng'okukwo.

² Afuge abantu bo mu butuufu, era agoloze abatuntuzibwa nga tasaliriza.

³ Ensi eveemu amakungula amalungi, n'obutuufu bwo bweyoleke.

⁴ Kyabazinga asale mu butuufu ensonga edh'abaavu; ayambe abali mu bwetaavu, atyankirire abo abaniinirira abaghafu.

⁵ Aghangaale ng'oti ndhuba, era ng'oti mwezi, ense n'ense.

⁶ Abe wa mugaso ng'amaadhi agagwa ku bisimbe mu nimiro, agagwa okufukirira eitaka.

⁷ Abantu abatuufu beeyongerenga okwala mu nnaku dhe, abantu babenga mu miraala okutuusa omwezi lwe guliwaagho.

⁸ Obwakyabazinga bwe bugazighe okuva ku nhandha okutuuka ku nhandha. Era buve ku mwiga Eufurate okutuuka ensi y'ekoma.

⁹ Abantu ababa mu irungu bamukubire amakiryaivu, n'abazigu be bakombe enkungu.

¹⁰ Bakyabazinga ab'e Tarushishi n'ab'omu bizinga bamutonere ebirabo; ni bakyabazinga ow'e Sheba n'ow'e Seba, boona bamughe ebirabo.

¹¹ Bakyabazinga boonaboona beeyale mu maiso ge; abantu abamaghanga goonagoona babe bagheereza be.

¹² Kuba abeera omunaku ng'amuliriire, era yaayamba n'omwavu aziraku amugha.

¹³ Agemerwa abanafu n'abaavu ekivunika, yaawonia obulamu bw'abanaku okuzikirira.

¹⁴ Abatoola ku abo ababadaazadaaza; n'ababakola eby'obukambwe, obulamu bwaibwe yaabutwala nga bwa mughendo inho y'ali.

¹⁵ Aghangaale! Abantu ab'omu Sheba bamughenga zaabu; abantu bamusabirenga era bamwendezenga enkabi buliidho omusana n'obwire.

¹⁶ Emere ebenga ya mwero mu byalo; ensozi dhoonadhoona dhiidhule misiri, ebibala byagyo bibe ng'oti n'ebibala eby'omu Lebanoni. Ebibuga biidhule abantu abangi ng'oti isubi.

¹⁷ Eriina lya kyabazinga liidhukirwenga ebyanda n'ebyanda. Obumanhifu bwe busigalegho ng'oti ndhuba. Abantu abamaghanga goonagoona bamwetenga wa nkabi, era basabenga Katonda okubafuula ab'enkabi oti ni kyabazinga oyo.

¹⁸ Musengwa Katonda asaakibwe, Katonda wa Isiraeli, ni yenka akola ebyewuunhisa.

¹⁹ Eriina lye ery'ekitiisa lisaakibwenga ebyanda n'ebyanda. Ekitiisa kye kiidhule ensi yoonayoona! Amiina era Amiina.

²⁰ Okusaba kwa Daudi mutabane wa Yesse ghano ghe kukanga.