Zabbuli 71 - Baibuli Ekibono kya Katonda 2014

Okusaba okw'omukaire adaazibwadaazibwa

¹ Wo Musengwa Katonda, niiwe ye neesiga, otandeka kuswala.

² Olw'obutuufu bwo ntoola aghabi omponie, tega kutu ompulirise era ondokole.

³ Nfuukira olubaale olw'okwewogomamu, era ombeere ekimante ekigumu ekineezungulwire eky'okumponia; kuba oli ng'oti lubaale era ng'oti kimante kigumu mwe neewogoma.

⁴ Wo Katonda wange, ntoola mu ngalo edh'ababi, ontoole mu buyinza obw'abantu abakambwe era ababi.

⁵ Wo Musengwa Katonda, niiwe mwe nsuubirira era nakwesiga ira okuva mu buto bwange.

⁶ Mu kuva mu nda mbairenga neesiga iwe; niiwe owantoola mu nda ya maama. Buli kaakyeire ndidha kukusaakanga.

⁷ Mbairenga kya kuboneraku eri abantu kamaala, olw'okuba iwe oli mukuumi wange ow'amaani.

⁸ Nkusaaka omusana n'obwire, era naakobera abantu nga bw'oli ow'ekitiisa.

⁹ Ni bwendikairigha otansuula ere; otandekulira agho ng'ate amaani gampweire.

¹⁰ Abazigu bange bandhogeraku; abo abaguniriire okumalagho obulamu bwange baneegeyaamu,

¹¹ nga bakoba bati: “Katonda amulekuliire agho, ka tumujiire tumugeme, kuba era ghazira muntu aidha kumututoola mu ngalo.”

¹² Wo Katonda wange, otamba ghala, yangughaku okumbeera.

¹³ Abo abaanumba baswaze era obazikirize. Abo abagezaaku okuntuusaaku ebizibu, baswalize irala era banhoomebwe.

¹⁴ Aye nze ndidha kusuubirira mu iwe buliidho; ndidha kweyongeranga okukusaaka obutalekera.

¹⁵ Omusana n'obwire ndidha kukoberanga abantu ebikolwa byo eby'obutuufu, mbakoberenga n'ebyo eby'obulokozi, waire nga tisobola kubitegeera kubimalayo.

¹⁶ Ndidha kutambuliranga mu maani go iwe Musengwa Katonda; ndidha kusaakanga obutuufu bwo, obubwo iwe wenka.

¹⁷ Wo Katonda wange, onsomeisa okuva mu buto bwange, ni ye buli eno nkaakobera abantu ebyewuunhisa by'okola.

¹⁸ Wo Katonda wange, ni bwendikairigha ni mmera envu, otandekuliranga agho, okutuusa nga nkobeire abantu amaani go n'obukumu bwo, ense dhoonadhoona edhija okwiragho.

¹⁹ Obutuufu bwo butuuka ni mu igulu. Okoze ebintu ebikologho, ezira ali ng'oti niiwe.

²⁰ Wansidikira ebizibu kamaala n'okudaagadaaga, aye olindhiriza amaani gange kabiri; olintoola ghansi eyo abantu ye baja, wamponia okufa.

²¹ Oidha kwongera okunfuula ow'ekitiisa; era ondhizeemu amaani kabiri.

²² Ndidha kukusaakanga n'entongooli olw'obwesigwa bwo, iwe Katonda wange. Ndidha kwembanga enhembo edhikusaaka n'endingidi, iwe Omutukuvu wa Isiraeli.

²³ Ndidha kukubanga emizira nga nkwembera enhembo edhikusaaka, kuba wandokola.

²⁴ Era ndidha kukoberanga abantu omusana n'obwire, nti niiwe obabeera mu butuufu; kuba abo abagezaaku okuntuusaaku ebizibu, banhoomeibwa era baaswazibwa.