Zabbuli 7 - Baibuli Ekibono kya Katonda 2014

Okusaba Katonda ow'obutuufu

¹ Wo Musengwa Katonda wange niiwe ye neesiga, mponia abankiriga era obalobere okuntuukaku.

² Tiikulwa nga bandhuzayuza ng'oti mpologoma, bankwekwebya nga ghazira n'ambeera.

^3-4 Wo Musengwa Katonda wange: Ghaligho omuntu yeenayeena ye nakola ekibi? Ghaligho ow'omukago ye natuusaaku akabi? Ghaligho omuzigu ye ntaakolera nga bwe kigwaine? Oba nga ghaligho ku ebyo kye nakola,

⁵ kale leka abankiriga bangeme, oba bankube enume ey'ekigwo, bandhite, era bandeke mu nkungu nga nfiire.

⁶ Wo Musengwa Katonda, idha obakambughalire. Situka Katonda wange tala, olwanise ekiruyi ky'abazigu bange, kuba iwe toyenda kusaliriza.

⁷ Abantu boonaboona basololeze gh'oli era obafuge ng'oli ghaigulu ghaibwe.

⁸ Niiwe osala emisango egy'abantu boonaboona. Sala ogwange oyoleke nga bwendi omutuufu era nga bwenzira musango gwonagwona.

⁹ Wo Katonda wange, oli mutuufu era weekebeedha emyoyo n'ebidhuubo eby'abantu. Lekeza ababi okukola obubi, oghe abo abakola obulungi okuba obukalamu.

¹⁰ Katonda n'engabo mwe neewogoma, alokola abo abagondera ebiragiro bye.

¹¹ Katonda asala omusango mu butuufu, era abakozi b'ebibi abasalira omusango okubasinga.

¹² Omuntu yeenayeena bw'ateenenia, Katonda aja kughagala empiima ye. Amaze okudhuumuula akalaso ke,

¹³ amaze okutegeka ebiisi eby'okubaitisa, era n'obulaso obwaka omuliro.

¹⁴ Bona, omukozi w'ebibi aba ng'oti mukazi, yaatoola enda ey'ebibi, yaaba enda erimu entegeka edh'okukola ebibi, era yaazaala obuguya.

¹⁵ Asima ebiina okutega baine, aye ate mwene yaabigwamu.

¹⁶ Entegeka dhe edh'okukola ebibi dhimwiriraku mwene, era obukambwe bwene bw'akozesa n'obumutaaku enguma.

¹⁷ Neeyanza Musengwa Katonda olw'obutuufu bwe, era nhemba enhembo edhisaaka Musengwa Katonda, oyo Katonda Ali Ghaigulu Yeene.