Zabbuli 69 - Baibuli Ekibono kya Katonda 2014

Okusaba kw'omuntu adaazibwadaazibwa

¹ Wo Katonda wange mponia, amaadhi gantuuse mu nkoto.

² Ndi kudimira mu bitosi omuzira gha kuniina naire. Ndi kweyongerayo bwa mu maadhi amaleeyi, omwidhuzo gw'amaadhi gwenda kundheyaagho.

³ Mpoiremu olw'okulira nga nkweta, amamiro gansaakaala. Amaiso tikaaghanga na kumoga, olw'okuteegerera Katonda wange okumbeera.

⁴ Abankyagha ng'ate ghazira kye mbakoze bali kamaala okusinga enviiri edhiri ku mutwe gwange. Abo abenda okusirisa obulamu bwange nga bampaama bye ntakoze, ba maani beenebeene. Bampaliriza okuligha ebintu bye ntaibangaku naire.

⁵ Wo Katonda wange, niiwe oidhi nga bwendi omusirusiru, ghazira kibi kye nakola ky'otaidhi.

⁶ Wo Musengwa Katonda Afuga Amagye, ka ndobe kuswaza abo abasuubira mu iwe. Wo Katonda wa Isiraeli, nhamba ndobe kunhoomesa abo abakusinza.

⁷ Ku lulwo abantu banvuma, era tikaayala na mu bantu.

⁸ Aboluganda lwange baaningaku ng'oti tibandidhi, baganda bange ku maama bambona ng'oti ndi wa ndha.

⁹ Okugonza einho eisinzizo lyo kuumazeegho; ebivumo by'abo abakuvuma biira ku nze.

¹⁰ Bwe neerumya nga nsiiba endhala, kinfuukira ekivumo.

¹¹ Bwe nvaala ekutiya olw'enaku, nfuuka kibono kya kudhondha.

¹² Nafuuka kya kughayaku eri abo abatyama mu kifo ky'olwekobaano, ku mulyango ogwingira mu kibuga, n'abatamiivu bandhiiyaamu enhembo.

¹³ Aye nze nsaba iwe Musengwa Katonda. Wo Katonda wange, ndhiraamu mu kiseera kyo mwene ky'oba ng'olonze, olw'okugonza kwo okungi okutakoma, era n'olw'okusuubiza kwo okwesigika.

¹⁴ Mponia okudimira mu bitosi ontoole mu ngalo edh'abazigu bange ndobe kweyongerayo mu maadhi maleeyi.

¹⁵ Otaganha mwidhuzo gwa maadhi kundheyaagho waire okundeka okudimira okutuuka ku ntobo. Era otaganha magombe kunsandikira.

¹⁶ Wo Musengwa Katonda, olw'okugonza kwo okutakoma n'olw'obulungi bwo ndhiraamu bye nkusaba; olw'okusaasira kwo okungi ba ku luuyi lwange.

¹⁷ Nze omwiru wo otankuba nkoone, yangughaku ombeere kuba ndi mu buzibu bunene.

¹⁸ Ndhiruukirira omponie, era nteekuluza abazigu bange.

¹⁹ Oidhi bwebanvuma ni banswazaswaza ni baanhooma; era oidhi abazigu bange boonaboona.

²⁰ Banvumye bankutula n'omwoyo, buti n'eisuubi nzira. Nanoonia anansaasiraku yambula; naanoonia anandhizaamu amaani, yambula.

²¹ Endhala bwe yaanuma, mu kifo eky'okumpa emere enkalamu, bampa eri ng'oti butwa; endiwo yaanuma bampa omwenge endoota.

²² Kale ni embaga dhaibwe dhe balya ka dhibafuukire ng'oti lutuula olubagemya; ebibinuko byaibwe eby'emisengo gye baaghaayo, ka bibaviiremu okugwa.

²³ Amaiso gaibwe ka gazibibwe, balobe kubona, era emigongo gyaibwe gifunhibwe enaku dhoonadhoona.

²⁴ Babonereze n'ekiruyi kyo, obamalireku obusungu bwo obwokya ng'oti muliro.

²⁵ Ebifo byaibwe mwe baba ka bisigale byanhe byereere ebizise; n'endhu dhaibwe dhisigale bifulukwa.

²⁶ Kuba baja baakiriga abo b'obonereiza; baayongera obulumi ku abo b'ofumiite.

²⁷ Kale babungeku ebibonerezo, ghabule y'osonighaku naire.

²⁸ Amaina gaibwe ka gasasibwe mu kitabo eky'obulamu; gatoolebwe mu lukalala olulimu abatuufu.

²⁹ Aye nze ndi kudaazibwadaazibwa era ndi mu bulumi. Wo Katonda wange mponia, onkuumire ghe batantuukiraku.

³⁰ Ndidha kusaakanga eriina lya Katonda mu lwembo; era ndhatulenga obukulu bwe nga mmusiima.

³¹ Ekyo n'ekisiimya Musengwa Katonda okusinga okumugha ente ng'ekigheebwayo, oba okumugha ente enume ng'omusengo, waire nga nkulu yeene eriku n'amayiga.

³² Abo abadaazibwadaazibwa bwe bakibona basangaala; abo abasinza Katonda bwe bakibona kibaizaamu amaani,

³³ kuba Musengwa Katonda awulirisa okusaba kw'abo abali mu bwetaavu era tiyeerabira bantu be abali mu busibe.

³⁴ Imwe eigulu n'ensi, n'enhandha ni byonabyona ebirimu, musaake Katonda.

³⁵ Katonda aliwonia Sioni abazigu, yairamu okuzimba ebibuga bya Yuda, abantu be baabityamangamu nga byaibwe ku bwaibwe.

³⁶ Biribanga bya nsikirano mu baana b'abantu be, n'abo abamugonza omwo mwe balibanga.