Zabbuli 68 - Baibuli Ekibono kya Katonda 2014

Katonda mughanguzi

¹ Wo Katonda, situkiramu osansaanie abazigu bo; abo abatakwenda balumuse embiro okuva mu maiso go.

² Ng'empewo bw'efuuwa omwosi ni guvaagho, weena otyo bw'obe obafuumuule embiro baje. Ng'omuzigo bwe gusaanuuka nga guli gha muliro, n'ababi boona batyo bwe babe bazikirire, baweegho mu maiso ga Katonda.

³ Aye abatuufu ka basangaale, basagambire mu maiso ga Katonda; ka basanhuke nga bakuba emizira.

⁴ Mwembere Katonda, mwembe enhembo edhisaaka eriina lye. Mumutegekere engira oyo aseeyeeya ku bire, eriina lye ni Musengwa Katonda, musagambire mu maiso ge.

⁵ Oyo ni Katonda aba mu kifo kye ekitukuvu, ni lata w'abo abazira balata baibwe era n'akuuma banamwandu.

⁶ Abo abazira ghe baba abafunira amaka ag'okubangamu, yaatoola abasibe mu makomera, yaabatuusa ku idembe ery'okusanhuka. Aye abadheemu abaleetera okusenga ku itaka ery'olubbalangu.

⁷ Wo Katonda, iwe wakulemberamu abantu bo waatambula ng'osala eirungu,

⁸ ensi yatengeeta, eigulu lyayugha amaadhi, olusozi Sinai lwadhugumira olw'okwidha kwo, iwe Katonda wa Isiraeli.

⁹ Iwe wagwisa amaadhi kamaala, waiza buyaaka eitaka lyo eryali lyoneike.

¹⁰ Abantu bo baakolamu ebisulo, era olw'obulungi bwo waagha abaavu ebyetaago byaibwe.

¹¹ Musengwa Katonda yagha ekiragiro, abantu kamaala baatambuza amawulire bati:

¹² “Bakyabazinga n'amagye gaibwe balumuka era balumuka!” Abakazi abaasigala eka n'abaagabana omunhago

¹³ ogw'enjiibwa edhiriku feeza, ng'amaghagha gaadho gamesunkana ni zaabu, waire ng'abakazi abo baasigala nga beegisiisa bwa mu bigo bya ntaama.

¹⁴ Katonda Aghanga Ebintu Byonabyona bwe yasansaaniza bakyabazinga eyo, omugozi gwagwa ku lusozi Zalumoni.

¹⁵ Bashani nga lusozi lukologho, luli n'emitwe kamaala emigulumivu!

¹⁶ Lwaki iwe olusozi oluli n'emitwe kamaala emigulumivu, olingirira n'ensaalwa olusozi Katonda lwe yeeroboza okubangaku? Bwenebwene Musengwa Katonda aja kubanga ku lusozi olwo ebyanda n'ebyanda.

¹⁷ Musengwa Katonda yaidha ku lusozi Sinai mu kifo ekitukuvu, ng'ali n'ebigaali bye eby'amaani eby'omu lutalo enkumi n'enkumi.

¹⁸ Yaaniina eyo ghaigulu ng'atwala abanhage kamaala; abantu nga mw'otwaliire n'abadheemu, baamutonera ebirabo. Musengwa Katonda eyo y'aja okubanga.

¹⁹ Tusaakenga Musengwa Katonda, oyo n'atwetwikira ebizibu byaife buli kaakyeire. Oyo ni Katonda atulokola.

²⁰ Katonda waife ni Katonda alokola, era Katonda waife ni Musengwa Katonda waife atuwonia okufa.

²¹ Katonda aja kutentena emitwe egy'abazigu be, abo abeekalangulira mu bibi byaibwe.

²² Musengwa Katonda yakoba ati: “Ndidha kubaiza okuva e Bashani, ndidha kubaiza okuva ku ntobo y'enhandha,

²³ memale mutyankirire omusaayi gwaibwe, n'embwa dhaimwe dhigunhwe okutuusa ku nkooye.”

²⁴ Abantu boonaboona babona nga bw'otambula n'ekitiisa iwe Katonda, otambula iwe Katonda wange era kyabazinga wange, ng'oingira mu kifo kyo ekitukuvu.

²⁵ Abembi n'abakulemberamu, abaghala abakuba obugoma n'ensaasi bairirira, memale ab'entongooli n'endingidi baakoobera.

²⁶ Nga bemba bati: “Musaake Katonda mu bantu be abeesoloiza; musaake Musengwa Katonda imwe mwenamwena aba Yakobo.”

²⁷ Ekika kya Benjamini ekisembayo okuba ekitono, nga n'ekikulemberamu, abakulu mu kika kya Yuda bairaku mu bikunsu byaibwe. Abakulu mu kika kya Zebuluni, n'abakulu mu kika kya Nafutali boona bairaku.

²⁸ Wo Katonda, yolesa nga bw'oli ow'amaani, yoleka amaani go g'okozesa okutubeera,

²⁹ ng'oli mu isinzizo lyo e Yerusalemu bakyabazinga ye bakutonerera ebirabo.

³⁰ Kaabukira ensolo edho edh'omu nsiko edhisula mu bigada; okaabukire abantu abo abaayira enume n'obuyana aghalala, era obatyankirire okutuusa lwe banaakuba amakiryaivu ni bakutonera feeza. Sansaania abantu abo abenda einho okutanula entalo.

³¹ Abakwenda abakologho balireetebwa okuva e Misiri; ate ab'e Ethiopia baagololera Katonda emikono gyaibwe.

³² Imwe abantu mwenamwena ab'oku nsi mwembere Katonda; mwembe enhembo edhisaaka Musengwa Katonda,

³³ oyo aseeyeeya ku igulu, eigulu eryaligho okuva eira n'eira. Wulira bw'akaabuka n'amamiro ag'amaani.

³⁴ Mulangirire nga Katonda bw'ali ow'amaani; obufuzi bwe bumaamira ensi Isiraeli yoonayoona amaani ge gabonekera ku igulu.

³⁵ Katonda ng'ali mu kifo kye ekitukuvu atiisa, Katonda oyo owa Isiraeli agha abantu be amaani n'obukumu. Katonda oyo asaakibwe!