Zabbuli 66 - Baibuli Ekibono kya Katonda 2014

Olwembo olw'abantu Katonda b'atoire mu busibe

¹ Abantu mwenamwena mukubire Katonda emizira.

² Mwembe enhembo edhooleka ekitiisa ky'eriina lye; musaake ekitiisa kye.

³ Mukobe Katonda muti: “By'okola nga bya ntiisa! Obuyinza bwo bungi, bukaka n'abazigu bo okwidha nga bagwirana okukukubira amakiryaivu.

⁴ Abantu boonaboona ku nsi bakusinza; bakwembera enhembo edhikusaaka nga basaaka eriina lyo.”

⁵ Mwidhe mubone Katonda by'akoze, ebintu by'akola mu bantu bya ntiisa.

⁶ Yafuula enhandha ng'oti bukalu abantu baasala omwiga nga batambula ku bigere. Agho twasagamba olw'ebyo bye yakola.

⁷ Olw'amaani ge afuga ebyanda n'ebyanda; era yaalingirira amaghanga n'amaiso ge ekiseera kyonakyona, abadheemu balobe kumudheemera.

⁸ Musaake Katonda waife imwe amaghanga; mumusaakire irala abantu babawulire.

⁹ Atugha obulamu yaatukuuma, era tatuganha kugwa.

¹⁰ Iwe Katonda waife, watugezesa, waatwekebeedha ng'oti ni feeza bw'alongoosebwa.

¹¹ Watuleka twagwa mu lutuula, era watutwika ebintu ebizito.

¹² Waleka abantu baatuniina mu mitwe; twabita mu bizibu ebyokya ng'oti muliro. Twabita ni mu bizibu ebingi ng'oti maadhi ga mwidhuzo. Aye buti watutuusa aghalungi.

¹³ Ndidha kuleetanga mu ndhu yo ebigheebwayo ebyokebwa, ntuukirizenga bye neeyama,

¹⁴ ebyo bye nasuubiza okukugha bwe nali nga ndi mu buzibu.

¹⁵ Ndidha kukughanga ensolo empiite ensavu ng'ebigheebwayo ebyokebwa; era ndidha kughangayo embuzi n'ente enume, aghalala n'entaama enume, memale omwosi gwabyo gunioke nga guja ghaigulu.

¹⁶ Imwe mwenamwena abatya Katonda mwidhe muwulire, ndidha kubakobera nze by'ankoleire.

¹⁷ Namulirira amaziga geene, naamwembera enhembo edhimusaaka.

¹⁸ Ngoli nali n'ebibi mu mwoyo gwange, Musengwa Katonda tiyandiwuliriisa kusaba kwange.

¹⁹ Aye bwenebwene Katonda yawulirisa okusaba kwange, era yankolera bye namusaba.

²⁰ Katonda asaakibwe, kuba talobye kuwulirisa kusaba kwange, oba okulekera agho okundholeka nga bw'angonza obutalekera.