Zabbuli 65 - Baibuli Ekibono kya Katonda 2014

Olwembo olw'okusaaka n'okusiima Katonda

¹ Wo Katonda waife, tusaine tukusaakenga mu Sioni, era kiisi yeeyama y'oli asaine atuukirizenga kye yeeyama

² eri iwe akolera abantu ebyo bye bakusaba. Abantu boonaboona baliidha y'oli

³ olw'ebibi byaibwe, kuba ebibi byaife bwe bitubitiriraku obitusonigha.

⁴ Wa nkabi oyo y'olonda n'omuseesa okumpi n'iwe, abenga mu kifo kyo ekitukuvu. Bwe tufuna ebirungi eby'omu ndhu yo, ni tufuna n'enkabi edhiva mu isinzizo lyo eitukuvu, titudhulirira kindi.

⁵ Bwe tukusaba otwiramu, waatuwonia ng'okola ebyewuninkiriza. Niiwe Katonda atulokola, era eisuubi ery'abantu boonaboona ab'oku nsi n'abo abali eyo ng'otuumye enhandha edhiri eghala einho.

⁶ Iwe wataagho ensozi olw'amaani go, kuba oli wa maani mangi.

⁷ Oikaikania okuwolomboka okw'enhandha, n'okuyira okw'amaadhi g'enhandha; era waikaikania okuwowoigana okw'abadheemu.

⁸ Abantu boonaboona ab'oku nsi waire ab'omu biketezo eby'eghala einho, batya olw'ebyo ebyewuninkiriza by'okola. Iwe oleetera ensi yoonayoona okukuba emizira, okuva endhuba y'eva okutuuka y'egwa.

⁹ Otugheereza amaadhi gaagwa okwoleka nga bw'olabirira ensi, waagigha eitaka eigimu einho, waagigha emiiga egitakala, ebirime byakula bukalamu. Otyo bwe wabikola.

¹⁰ Ofukirira obulime n'amaadhi amangi, waamulungula ebifunfugu, waagonza eitaka n'amaadhi amangi ago, ebirime byakula bukalamu.

¹¹ Ogha abantu bo okukungula ebingi kuba oli mulungi. Buli ghantu ghaligho ebirungi kamaala.

¹² Abantu bo eyo ye baayira ebyayo byaibwe, eisubi litoonha butoonhe. Buli kasozi kanhoonha okubona.

¹³ Ebifo ebyayirwamu biidhwire byayo; ebiiko biidhwire misiri gya mere, nga byonabyona byemba era nga bwe bikuba emizira.