Zabbuli 64 - Baibuli Ekibono kya Katonda 2014

Okusaba kw'omuntu ali kutiisibwatiisibwa abazigu

¹ Wo Katonda wange mpulirisa, nzira idembe, mponia abazigu bange abantiisa einho.

² Iwe nkuuma ababi balobe kunkola ebyo bye bali kuneeteesaaku mu ngiso; era onkuume ebikuukuulu by'abakozi b'ebibi balobe kunkola ebyo bye bategeike.

³ Bakozesa enimi dhaibwe ng'oti mpiima, baakozesa ebibono ebikambwe ng'oti bulaso bwa busagwa.

⁴ Beeteega baazinduukiriza omuntu aziraku musango, baamulasa mangu nga bazira ni kye batya.

⁵ Beekalangula mu bikolwa ebibi, beekobaana gha ghe banaatega emitego, nga bakoba bati: “Naani anaatubona?

⁶ Naani asobola okwiguka mu butemo buno? Tukozeisa amagezi kamaala okuyiiya entegeka eno.” Ebiri mu mwoyo gw'omuntu era n'ebyo by'alowooza, kizibu okubitegeera.

⁷ Aye Katonda aja kubalasa akalaso ke, era amangu ago geene baja kulumizibwa.

⁸ Aja kubazikiriza olw'ebibono byaibwe bye boogera. Boonaboona abalikibona baja kutengeesa emitwe nga beewuunhia.

⁹ Olwo abantu boonaboona baja kutya, baghaye ku ebyo Katonda bye yakola, era bisigale ku myoyo gyaibwe nga babidhuuba.

¹⁰ Abatuufu ka basagambe, kuba Musengwa Katonda by'abakoleire bikulu, era ka beeyune gh'ali bawone abazigu. Abo abagondera ebiragiro bya Katonda ka basaake Musengwa Katonda.