Zabbuli 63 - Baibuli Ekibono kya Katonda 2014

Omuntu ayenda einho okuba mukagwa wa Katonda

¹ Wo Katonda, niiwe Katonda wange, omwoyo guunumira iwe. Nhenda inho okuba gh'oli; ng'oti n'eitaka eikalu bwe lyetaaga maadhi.

² Nhenda inho okukubona mu kifo kyo ekitukuvu; mbone obukumu bwo n'ekitiisa kyo.

³ Ndidha kukusaakanga, engeri y'ongonzaamu obutalekera ensingira n'obulamu bwene.

⁴ Kale ni ndidha kukusiimanga obulamu bwange bwonabwona; ndidha kukusabanga n'emikono gyange ghaigulu.

⁵ Ndidha kuwuliranga mule bukalamu ng'oti n'omuntu aliire ku mbaga ensavu, era ndidha kukusaakanga n'eisanhu.

⁶ Ni bwenja mu buliri nkulowooza; obwire bwonabwona tikwerabira,

⁷ kuba buli kaakyeire niiwe ombeera. Bwemba mu ngalo dho nhemba olw'eisanhu.

⁸ Neekalanguliire ku iwe, kuba onkuuma n'omukono gwo ogw'amaani.

⁹ Aye abo abanoonia okuzikiriza obulamu bwange, baidha kwika ghansi abafu ye baja.

¹⁰ Baidha kufiira mu kulwana ntalo emirambo gyaibwe giriibwe ebibe.

¹¹ Aye kyabazinga aidha kusagambanga olw'obughanguzi Katonda bw'amutuusaaku. Abo boonaboona abalayira eriina lya Katonda baidha kumusaakanga, kuba Katonda alisirisa eminwa egy'abaguya.