Zabbuli 6 - Baibuli Ekibono kya Katonda 2014

Okusaba okw'omuntu ali mu buzibu

¹ Wo Musengwa Katonda, otandhuuka na busungu, era otankangaivula na kiruyi.

² Wo Musengwa Katonda, idha ondhune, gampweire, mponia ebiinuma, nsigaire magumba meereere.

³ Zeenazeena ndi agho ntyo, omwoyo n'omubiri. Aye Musengwa Katonda otalwa kumbeera.

⁴ Ndhiriraamu, Musengwa Katonda, ondhirize obulamu; olw'okungonza einho mponia okufa;

⁵ kuba mu bafu ghazira akwidhukira era mu bali e magombe ghazira akusaaka.

⁶ Ndi munafu mwene olw'okusula nga nsinda. Obwire bukya ng'obuliri bwange buboze olw'okulira, n'akaito ke neeziziike kaatoonha amaziga.

⁷ Amaiso gali kuunafugha, era gali kunfaamu olw'abazigu abandiza.

⁸ Munveeku imwe mwenamwena abakozi ab'ebibi; kuba Musengwa Katonda awulira okulira kwange.

⁹ Ampulirisa nga ndi kumusaba okumbeera era aidha kwiramu okusaba kwange.

¹⁰ Abazigu bange boonaboona baja kugemwa ensoni n'entiisa era okutemya n'okuzibula nga bali kutebenta emisinde olw'okuswala.