Zabbuli 59 - Baibuli Ekibono kya Katonda 2014

Okusaba kw'omuntu abazigu ye benda okwita

¹ Wo Katonda wange, mponia abazigu bange, nkuuma abaanumba balobe kuntuukaku.

² Mponia abakozi b'ebibi, ondokole okuva mu batemo.

³ Bona ere, baneeteeze benda kundhita; abantu abakambwe beesoloiza baanumbe. Ti lwa kuba nti ndaaliimye oba nti nkoze ekibi kyonakyona.

⁴ Aghazira kisobyo kye nkoze, beeyuniriza emberi wange okuneeteega. Musengwa Katonda balingirire obone, era ositukiremu oidhe ombeere.

⁵ Iwe Musengwa Katonda Afuga Amagye, niiwe Katonda wa Isiraeli. Situka obonereze abantu abatakutya; otasaasira waire mulala ku abo abakudheemera ni bakola ebibi.

⁶ Buli igulo baira nga bawowoigana ng'oti mbwa, era baaja nga baluga mu kibuga.

⁷ Wulira bwe bawowoigana nga baasaime. Ebibava mu kanwa mpiima dheene edhifumita, aye ng'ate balowooza bati ghazira ali kubawulira.

⁸ Aye iwe Musengwa Katonda obasekerera busekerere; abantu boonaboona abatakutya obakongoola bukongoole.

⁹ Niiwe amaani gange, niiwe ye ningiriireku, kuba iwe Katonda wange, niiwe ye neesiga.

¹⁰ Katonda wange olw'okungonza einho, aliidha yambeera, naabona abazigu bange nga baghangwirwa.

¹¹ Wo Katonda wange, otabaita, kuba tiikulwa ng'abantu bange beerabira. Aye kozesa obukumu bwo obasansaanie era obasuule ghansi, iwe Musengwa Katonda engabo yaife.

¹² Ka basigale nga bagemeibwa mu kwebona kwaibwe, ng'oti n'ensolo bw'egwa mu lutuula. Kuba boonoona n'eminwa gyaibwe, na kiisi kibono kye boogera. Era olw'okuba bakolima era baaguya,

¹³ bazikirize mu busungu bwo; bazikirize bagheekereregho irala. Abantu boonaboona bakimanhe nga Katonda n'afuga mu Isiraeli, n'okutuukira irala ensi y'ekoma.

¹⁴ Buli igulo baira nga bawowoigana ng'oti mbwa, era baaja nga baluga mu kibuga.

¹⁵ Beewunhawunha ghano ni ghale nga baagala eky'okulya, era baatolotooma bwebaba nga tibaigwite.

¹⁶ Aye nze ndidha kwembanga nga nsaaka amaani go; buli nkyo ndidha kwemberanga ghaigulu okugonza kwo okutakoma, kuba buliidho niiwe obairenga obubudamo bwange, era niiwe obairenga obulumukiro mu biseera ebizibu.

¹⁷ Niiwe amaani gange, niiwe ye ningiriireku, kuba iwe Katonda wange, niiwe ye neesiga, Katonda angonza obutalekera.