Zabbuli 58 - Baibuli Ekibono kya Katonda 2014

Okusaba Katonda abonereze ababi

¹ Imwe abafuzi, mugha ensala y'emisango entuufu? Timusaliriza bwemusalira abantu emisango?

² Busa! Mu myoyo gyaimwe muyiiya bwa ngeri ye munaakolamu ekikyamu, era imwe beene mukola ebikolwa eby'obukambwe ku nsi.

³ Ababi badaaliima okuviira irala nga bakaali na mu nda; basobya okuviira irala ku kuzaalibwa, nga boogera eby'obuguya.

⁴ Bali n'obusagwa ng'oti bwa musota, ate baaba basigha ng'oti kiyiri, ekisemba amatu gaakyo,

⁵ kirobe kuwulira mamiro g'oyo agema emisota, oba okuwulira oluluzi lw'oyo agizaanhisa.

⁶ Wo Katonda wange, bamenhemu amaino mu kanwa. Wo Musengwa Katonda, igha mu mpologoma edho ento amaino amasongero.

⁷ Leka babulegho ng'oti n'amaadhi agakuuluula; batyankirire babe ng'oti isubi baniale.

⁸ Ka babe ng'oti ikovu erisaanuukira mu lugezi lwalyo ni liwaagho. Oba babe ng'oti n'enda evaamu, ekintu ekivaamu ni kitabona ku ndhuba.

⁹ Katonda agwana yaabasaaniagho amangu geene, nga n'entamu ekaali kuwulira muliro gwa mawa, ka gabe amabisi oba agali kwaka.

¹⁰ Abatuufu balisagamba okubona nga Katonda abonereiza aboonooni; balityankirira omusaayi ogw'ababi.

¹¹ Agho abantu ghe balikobera bati: “Bwenebwene Katonda asasula abatuufu yaabasiima; bwenebwene eriyo Katonda asala emisango ku nsi.”