Zabbuli 57 - Baibuli Ekibono kya Katonda 2014

Okusaba okw'omuntu ali mu bazigu

¹ Wo Katonda wange, nsaasira era nsaasirira irala, kuba niiwe ye neesiga. Mpambaatira ng'oti n'enkoko bw'ekola obwana bwayo, okutuusa kiwunga ono azikiriza ng'amaze okubita.

² Nze ndi kulirira Katonda Ali Ghaigulu Yeene, oyo atuukiriza mu nze ekigendererwa kye.

³ Aidha kutuma amaani okuva mu igulu okwidha okumponia. Abo abankiriga aidha kubaswaza. Katonda aidha kundholeka nga bw'angonza obutalekera era nga bw'ali omwesigwa.

⁴ Buti ndi ghagati mu mpologoma edhikankamira abantu, edhiri n'amaino ng'oti mafumo na bulaso, edhiri n'enimi endhogi ng'oti mpiima.

⁵ Wo Katonda wange, yoleka obukulu bwo bubonebwe ghaigulu okusinga eigulu, era n'ekitiisa kyo kimaamire ensi yoonayoona.

⁶ Abazigu bange bantega olutuula, naazirika mu mwoyo gwange. Baasima ebiina mu ngira ye mbitamu, aye baabigwamu beene!

⁷ Wo Katonda wange, omwoyo gwange guli ku iwe, era ku iwe wenka! Ndidha kwembanga enhembo edhiwooma!

⁸ Iwe omwoyo gwange zuuka! Iwe entongooli yange, n'iwe endingidi yange muzuuke. Leero ndidha kuzuusa endhuba.

⁹ Wo Musengwa Katonda, ndidha kukusiimanga nga ndi mu bantu, era nkusaakenga nga ndi mu maghanga.

¹⁰ Kuba okugonza kwo okutakoma kungi inho, kutuuka ni mu igulu; obwesigwa bwo butuuka mu bire.

¹¹ Wo Katonda wange, yoleka obukulu bwo bubonebwe ghaigulu okusinga eigulu, n'ekitiisa kyo kimaamire ensi yoonayoona.