Zabbuli 56 - Baibuli Ekibono kya Katonda 2014

Okusaba okw'omuntu eyeesiga Katonda

¹ Wo Katonda wange nsaasira, kuba abantu baanumba; buli kiseera abazigu bange bankiriga.

² Buli kiseera abatanhenda baanumba, kuba abankyagha bali kamaala.

³ Wo Musengwa Katonda iwe Aghanga ebintu byonabyona, ni bwemba nga ntiire inho, obwesige bwange bundi mu iwe.

⁴ Iwe Katonda wange nkusaaka olw'ebyo by'onsuubiza, era nkwesiga nga nzira kintiisa. Omuntu obuntu katyo asobola kunkola ki?

⁵ Buli kiseera bagezaaku okundeetera ebizibu. Buli kaakyeire basala amagezi ag'okuunumya.

⁶ Beekolamu obukuukuulu mu ngiso, baanondoola mu buli kye nkola, nga banoonia akaghagaanhia okundhita.

⁷ Wo Katonda wange, baghe ekibonerezo ekigwanira ebibi byaibwe; yoleka obusungu bwo obakube ghansi.

⁸ Iwe oidhi nga bwendaazibwadaazibwa einho, n'amaziga ge naakalira ogaidhi. Byonabyona biri mu kitabo kyo.

⁹ Ku lunaku lwe ndikusaba, oliiririzaayo abazigu bange einhuma; kuba ndidhi nti oli ku luuyi lwange.

¹⁰ Iwe Katonda wange nkusaaka olw'ebyo by'onsuubiza; Iwe Musengwa Katonda nkusaaka olw'ebyo by'onsuubiza,

¹¹ era nkwesiga nga nzira kintiisa. Omuntu obuntu katyo aghanga kunkola ki?

¹² Wo Katonda wange, nteekwa okutuukiriza obweyamo bwange; ndidha kughaayo omusengo olw'okukusiima,

¹³ kuba wamponia okufa era wamponia okughangulwa naatambula, nga niiwe omukuumi wange, mu butangaavu obwakira abalamu.