Zabbuli 55 - Baibuli Ekibono kya Katonda 2014

Okusaba okw'omuntu mukagwa we ye yalyamu olukwe

¹ Wo Katonda wange, wulira okusaba kwange, otankuba nkoone nga ndi kukweghemba.

² Nkusaba ompulirise era ombeere; okweraliikirira kunseeneinia.

³ Ndhugumira olw'okutiisibwatiisibwa abazigu bange, gampweire olw'okuba abakozi b'ebibi bankiriga. Bandeetera ebizibu, era bantaaku enzigu nga baneeguguna.

⁴ Omwoyo guntyemuka naatya, n'enviiri dhampwa ku mutwe olw'okutya okufa,

⁵ naadhugumira olw'okutya, n'ensisi yankuba ere.

⁶ Naakoba nti: “Yii kale ngoli ndi n'amaghagha ng'oti ighemba! Nandigulwike naatuuka ghe nsobola okuwuumulira.

⁷ Bwenebwene nandipaire bupaale, naaja naasenga eyo mu irungu.

⁸ Nandyangwighe naabona ghe neigama, naawona amaadhi gano agalimu kiwunga n'omugozi.”

⁹ Wo Musengwa Katonda, zikiriza olulimi lw'abazigu bange, otabuletabule bye boogera; kuba mbona ekibuga kiidhwire okwegugunga n'ebikolwa eby'obukambwe.

¹⁰ Omusana n'obwire beezungulula ebisenge byakyo, baakola ebikolwa eby'obukambwe, era baakola ku banaibwe ebibi.

¹¹ Bazikiriza ebintu mu kibuga woonawoona, era mu nguudo dhaakyo timuwaamu bantu batuntuza banaibwe, n'abaguya banaibwe.

¹² Ngoli muzigu wange n'eyali ali kundheedha, tinandifiire yo. Oba ngoli oyo ye tutaisania naye n'eyali ali kuneeyagaliraku, naalimwegisiisaaku.

¹³ Aye mbo iwe bwetufaanana, bwetubita, era mukagwa wange mwene, niiwe okola ekyo?

¹⁴ Twalinga nga tughaya bukalamu, era ng'okuja mu isinzizo titulekagana.

¹⁵ Abazigu bange mbendeza kufa kikutuko, baaziikibwa nga balamu. Amaka gaibwe gaidhwire abakozi b'ebibi, ebiidhwire mu myoyo gyaibwe.

¹⁶ Aye nze nsaba Katonda, era Musengwa Katonda oyo aidha kundokola.

¹⁷ Enkyo, n'omusana, n'eigulo, mmukobera ebiinuma, n'ebindeetera okusinda era aidha kumpulira.

¹⁸ Aidha kundhiza bwera okuva mu ntalo dhe nwana, kuba bali kamaala abeetegeike okulwana ninze.

¹⁹ Katonda oyo Kyabazinga ow'eira, aidha kumpulira era abaghangule; kuba tibamutya era tibaganha kukyuka.

²⁰ Munange bwe twabitanga yatanula olutalo ku bakagwa be, yaamenhagho omukago gwe nabo.

²¹ Ng'akozesa olulimi olw'okwewooya, ate nga mu mwoyo gwe mwidhwire nzigu ebibono bye nga biwooma okuwulirisa, aye nga bifumita oti mafumo geene.

²² Ebizibu byo birekere Musengwa Katonda, aidha kukukuuma. Taleka bantu bakola bituufu kughangulwa.

²³ Aye iwe Katonda wange, abantu abo abatemo era abaguya, oidha kubasindika mu magombe gaibwe nga bakaali na kutuuka ghagati gha nnaku dha bulamu bwaibwe. Aye nze ndidha kukwesiganga buliidho.