Zabbuli 52 - Baibuli Ekibono kya Katonda 2014

Katonda asala emisango mu butuufu

¹ Iwe ow'amaani, lwaki weesaaka olw'ebibi by'okola ku abo abatya Katonda? Olunaku lwonalwona

² olumala ng'otegeka kuzikiriza. Olulimi lukuli ng'oti kamwano akoogi, omuguya iwe.

³ Ogonza okukola ebibi okusinga okukola ebikalamu era ogonza okusubagha okusinga okwogera ebituufu.

⁴ Omuguya iwe, osanhukira inho okwogeza omunwa gwo ebirumya abandi.

⁵ Aye Katonda aidha kukuzikiriza ebyanda n'ebyanda; aidha kukuswankula mu ndhu yo akukwekwebye; aidha kukutoola mu nsi ey'abalamu.

⁶ Abatuufu bwebalibona ebyo ensisi eribagema, baakuseka nga bakoba bati:

⁷ “Mubone omusaadha eyaloba okweguya Katonda okumukuuma, nga yeesigulira ku bukombe bwe obungi, era nga yeesiga enkwe dhe edh'obuguya okumukuuma.”

⁸ Aye nze ndi ng'oti n'omuti omwoliva omugimu, ogukulira mu ndhu ya Katonda. Nkakasa nga Katonda aidha kungonzanga obutalekera ebyanda n'ebyanda.

⁹ Ndidha kukusiimanga ebyanda n'ebyanda olw'ebyo bye wakola mu bantu bo abakutya ndidha kukoberanga abantu nga bw'oli omulungi.