Zabbuli 50 - Baibuli Ekibono kya Katonda 2014

Okusinza okutuufu

¹ Musengwa Katonda Aghanga Ebintu Byonabyona, ayogera ng'ayeta abantu boonaboona okuva endhuba y'eva okutuuka y'egwa.

² Katonda oyo ayakaayakana ng'ali mu Sioni ekibuga ekituukiriire mu bulungi bwakyo.

³ Katonda waife aidha, aye taidha kisiriikiriza; omuliro ogwaka einho gumukulemberamu nga kiwunga ow'amaani amwezungulwire.

⁴ Ayeta eby'omu igulu ghaigulu n'eby'oku nsi, okubaagho ng'asalira abantu be omusango.

⁵ Yaakoba ati: “Munsololeze abantu bange abeesigwa, abaakola ninze endagaano nga baghaayo omusengo ye ndi.”

⁶ Eby'omu igulu birangirira nga Katonda bw'ali omutuufu, kuba mwene n'asala omusango.

⁷ “Imwe abantu bange mumpulirise, ndi ni kye mbakoba; imwe Abaisiraeli, ndidha kubalumiriza. Ninze Katonda, Katonda waimwe.

⁸ Tiri kubanenia lwa misengo gyaimwe, oba olw'ebigheebwayo ebyokebwa bye mumpa.

⁹ Tineetaaga nte dhaimwe nume okuva mu ngo dhaimwe, waire embuzi dhaimwe enume okuva mu bisibo byaimwe;

¹⁰ kuba kiisi nsolo yoonayoona ey'omu nsiko yange, n'ente dhoonadhoona edhiri eyo ku nsozi enkumi n'enkumi, dhoona dhange.

¹¹ Enhonhi dhoonadhoona edh'omu ibbanga dhange, n'ebiramu ebindi byonabyona ebitambula ku nsi.

¹² Ni bwenandibaire endhala, tinandibakobye kumpa mere, kuba ensi yoonayoona n'ebigirimu byange.

¹³ Mulowooza nze ndya emamba y'ente enume, oba okunhwa omusaayi gw'embuzi?

¹⁴ Omusengo gwaimwe ka gubenga okunsiima nze Katonda, era mutuukirizenga bye mweyama eri nze Ali Ghaigulu Yeene.

¹⁵ Munsabenga nga muli mu bizibu, ndidhanga kubawonia, imwe muntengamu ekitiisa.”

¹⁶ Aye abakozi b'ebibi Katonda ababuuza ati: “Mudaagiranga ki okudeeberera amateeka gange, oba okughaya ku ndagaano yange?

¹⁷ Timwenda kugalagirwa, era bye mbakoba mubisuula bw'ere.

¹⁸ Bwemubona omwibi, ng'oyo afuuka mukagwa waimwe, era omwenzi mumwaniriza.

¹⁹ Mulekera eminwa gyaimwe eidembe okukola ebibi; n'enimi dhaimwe dhaayogera eby'obuguya.

²⁰ Mutyama mwayogera ebibi ku baganda baimwe beene, era mwabasiiga n'enziro.

²¹ Mwakola ebintu ebyo nze naasirika, mwalowooza muti zeena ndi ng'oti niimwe. Aye buti ndi kubanenia nti mukola bubi inho, era omusango ogwo nhenda ngwerule mugubone bukalamu.

²² Mumanhe kino imwe abatanfaaku nze Katonda: nsobola okubayuzayuza ate nga ghazira na muntu wa kubawonia.

²³ Ole bw'asiima, aba aghaireyo omusengo ogumpeesa ekitiisa, era nja kulokola oyo atambulira mu ngira entuufu.”