Zabbuli 49 - Baibuli Ekibono kya Katonda 2014

Obukombe tibwesigika

¹ Imwe abantu mwenamwena muwulire bino! Mutege kutu imwe mwenamwena ab'oku nsi,

² abakologho n'abatali bakologho, abakombe n'abaavu.

³ Nja kwogera bya magezi n'omunwa gwange, ebidhuubo eby'omu mwoyo gwange biidha kwoleka okutegeera.

⁴ Ndidha kuwulirisa ensambo, era nhembe amakulu g'ebikoiko ku ndingidi.

⁵ Tiidha kutyanga nga ndi mu buzibu, waire ng'abankiriga baneezungulwire,

⁶ abantu abo beesiga bukombe bwaibwe era beesuuta olw'ebintu kamaala bye baba nabyo.

⁷ Bwenebwene ghazira muntu asobola kwenunula mwene, oba okusasula Katonda omughendo oguja mu bulamu bwe;

⁸ kuba obulamu bw'omuntu bwa mughendo inho, era ghazira muntu ky'agha ni kimala,

⁹ n'asobola kuba mulamu ebyanda n'ebyanda, era naaloba kufa.

¹⁰ Bwenebwene tubona nga n'abagezi bafa, era nga n'abasiru ghalala n'abadoofu bawaagho, obukombe bwaibwe baabulekera bantu bandi.

¹¹ Amagombe gaibwe n'amaka gaibwe ebyanda n'ebyanda, ense n'ense dhaabitagho nga bali eyo, waire nga baaliku n'amataka agaibwe ku bwaibwe.

¹² Ebitiibwa by'omuntu tibimulobera kufa; awaagho ng'ensolo bwedhiwaagho.

¹³ Bino n'ebituuka ku basiru abeesiga amagezi gaibwe, era eno n'enkomerero y'abo ababona ng'ebintu bye bali nabyo bya makulu inho:

¹⁴ Basindikibwa mu nsi ey'abafu ng'oti ntaama, olumbe lwabaaya, baaserengeta mu magombe aghazira kusibamu, emibiri gyaibwe gyavundira eyo. Mu nsi y'abafu n'eri amaka gaibwe.

¹⁵ Aye nze, Katonda alimponia okufugibwa ensi y'abafu, kuba aliinunula.

¹⁶ Tiweegombanga muntu akombaghala, ebitiibwa by'endhu ye ni byeyongera,

¹⁷ kuba bw'alifa ghazira ky'aja kuja nakyo, oba ebitiibwa bye okumunonereza mu magombe.

¹⁸ Waire nga yeebala okuba ow'enkabi ng'akaali mulamu, era waire ng'asaakibwa olw'ebintu okumujiira obukalamu,

¹⁹ aja kufa yeeyimbe ku badhaadha be abaafa, obutaja kwirayo kubona ku ndhuba kabiri.

²⁰ Ebitiibwa by'omuntu tibimulobera kufa, awaagho ng'ensolo bwedhiwaagho.