Zabbuli 48 - Baibuli Ekibono kya Katonda 2014

Sioni ekibuga kya Katonda

¹ Musengwa Katonda mukologho, era ni yenka agwaine okusinzibwa mu kibuga kya Katonda waife, ku lusozi lwe olutukuvu.

² Sioni olusozi lwa Katonda luleeyiriri era luboneka bulungi; ekibuga kya kyabazinga omukologho kisanhusa ensi yoonayoona.

³ Katonda ayoleike nga mwene n'omukuumi w'ekibuga ekyo.

⁴ Bakyabazinga n'amagye gaibwe beesoloza baidha okukirumba.

⁵ Aye olwakibona bati beewuunhia, baatya, baakyuka baalumuka.

⁶ Baatya inho era baalumwa ng'oti n'omukazi bw'alumwa ng'azaala.

⁷ Era baaba ng'oti n'amaato ag'e Tarushishi, agamenhebwamenhebwa kiwunga ow'amaani ava e buvandhuba.

⁸ Katonda waife, oyo Musengwa Katonda Afuga Amagye, ebyo bye twawuliranga obuwulire bye yakola, ni mpegaano tubiboine mu kibuga kye ky'akuuma obutalumbwa ebyanda n'ebyanda.

⁹ Wo Katonda waife, nga tuli mu isinzizo lyo twefumintiriza inho ku ngeri y'otugonzaamu obutalekera.

¹⁰ Okuva ensi y'eva okutuuka y'ekoma, abantu boonaboona bakwidhi era bakusaaka. Obufuzi bwo buziramu kwekubira.

¹¹ Abantu ab'oku lusozi Sioni ka basanhuke, n'ab'omu bibuga bya Yuda basagambe; kuba osala ensonga mu butuufu.

¹² Mutambule mu Sioni mwonamwona mukyezungulule, muje nga mubala ebituuti ebirengererwaku ebirimu;

¹³ mulingirire bukalamu obugumu bw'ebimante ebikyezungulwire, mukebere ebifo byakyo eby'okwewogomamu, olwo musobole okukobera ab'oluse oluliiragho

¹⁴ muti: “Katonda ono, ni Katonda waife ebyanda n'ebyanda. Ono n'aidha okutukulemberangamu ebyanda n'ebyanda.”