Zabbuli 46 - Baibuli Ekibono kya Katonda 2014

Katonda ali ku luuyi lwaife

¹ Katonda n'omukuumi waife, era oyo n'amaani gaife, buliidho abaagho era nga mwetegefu okutubeera nga tuli mu buzibu.

² Olw'ekyo tituja kutya, ensi ni bw'etengeesebwa, n'ensozi ni dhidhugumira okuviira irala ku ntobo y'enhandha,

³ n'amaadhi gaamu ni gawologoma ng'oti mpologoma era ni gafuukeera, n'ensozi ni dheesundasunda n'amaani amangi einho.

⁴ Eriyo omwiga oguli n'emyala egireeta eisanhu mu kibuga kya Katonda, agho mu ndhu entukuvu aghali oyo Ali Ghaigulu Yeene.

⁵ Katonda mwene aba mu kibuga ekyo, era tikisobola kuzikirizibwa; Katonda awuuna buwuune mu nkyonkyo okukirwanirira.

⁶ Katonda bw'aboigoka, abamaghanga baidhamu okutya okw'amaani, obwakyabazinga bwatengeesebwa n'ensi yoonayoona yaatengera.

⁷ Musengwa Katonda Afuga Amagye ali n'ife; Katonda wa Yakobo n'omukuumi waife.

⁸ Mwidhe mubone ebikulu Musengwa Katonda by'akoze; mubone ebyewuninkiriza by'akoze ku nsi.

⁹ Alekeza okulwana entalo mu nsi yoonayoona; yaakutulakutula mu bulaso, era yamenhamenha amafumo, n'engabo yaadhikumaku omuliro.

¹⁰ Era alagira ati: “Mulekere agho! Mumanhe nga ninze Katonda. Nsinzibwa amaghanga goonagoona, era nsinzibwa ebiri ku nsi byonabyona.”

¹¹ Musengwa Katonda afuga amagye ali n'ife; Katonda wa Yakobo n'omukuumi waife.