Zabbuli 45 - Baibuli Ekibono kya Katonda 2014

Olwembo lwa kyabazinga ku lunaku lw'abayiiza

¹ Omwoyo gwange gwidhwire ebibono ebikalamu bye nja okughandiika. Olwembo luno ndi kuluyiiyiza kyabazinga, olulimi lwange lwetegeike ng'oti n'ekalaamu ey'omughandiisi omukugu.

² Iwe osinga abasaadha abandi boonaboona abali ku nsi obulungi. Bw'oyogera ghazira ayenda olekere, olw'ekyo Katonda yakugha enkabi edhitaja kukuvaaku.

³ Gema empiima yo, Iwe kyabazinga ow'amaani, mu kitiisa kyo nga kyabazinga!

⁴ Iwe kyabazinga, ja mu lutalo obe mughanguzi ng'olwanirira amazima n'obutuufu. Amaani go ka gakole ebyewuunhisa!

⁵ Obulaso bwo bwogi bwene, bufumita omwoyo gw'abazigu bo, amaghanga n'amaghanga gaagwa ghansi ku bigere byo.

⁶ Obwakyabazinga bwo, Katonda bwe yakugha, bwidha kusigalagho ebyanda n'ebyanda. Obufuzi bwo bube obufuzi obuziramu kyekubira.

⁷ Ogonza ebikolwa ebituufu, waakyagha ebikolwa ebibi. Kyova Katonda, Katonda Oyo owuwo, yakusiiga omuzigo mu isanhu okusinga abantu abandi boonaboona.

⁸ Ebivaalo byo biwunha kawoowo ka mirra, alowe ni kassia. Entongooli n'endingidi dhivuga dhaakusanhusa mu bisaagaati ebidholige n'amasanka.

⁹ Abandi ku bakazi ab'ebitiisa abali mu luya lwo, baana ba bakyabazinga, ku luuyi lw'omukono gwo omusaadha n'aghali inhebantu, ng'avaire ebya zaabu ole mwene ava mu Ofiri.

¹⁰ Iwe inhebantu, tega amatu owulire, weerabire abantu bo n'ab'endhu ya lata wo,

¹¹ kyabazinga aidha kwenda obulungi bwo. Oyo ni musengwa wo, oteekwa okumuwuliranga.

¹² Abantu ab'e Tiro balikuleetera ebirabo obasiime, abantu abo abasinga kuba bakombe,

¹³ abali n'obukombe obwa buli nsambo. Omumbeedha ali kwingira mu kisaagaati kya kyabazinga, aboneka bulungi inho, ebivaalo bye byakolebwa mu zaabu.

¹⁴ Ng'ali mu kivaalo kye ekidholige atwalibwa ye kyabazinga ni baine abaguna, ng'emperekezi.

¹⁵ Nga basangaavu era nga bali kusagamba, bangira mu kisaagaati kya kyabazinga.

¹⁶ Iwe kyabazinga, abaana bo balisikira badhaadha bo nga bakyabazinga. Olibafuula bafuzi okufuga ensi eno yoonayoona.

¹⁷ Mu lwembo lwange, abantu ab'ense n'ense baja kwidhukiranga obumanhifu bwo, olw'ekyo amaghanga gaja kukusaakanga ebyanda n'ebyanda.