Zabbuli 44 - Baibuli Ekibono kya Katonda 2014

Okusaba okubeerwa mu lutalo

¹ Wo Katonda waife, twawulira n'amatu gaife nga badhaadha baife batukobera ebyo bye wakolanga mu nnaku dhaibwe, mu biseera ebyabita.

² Nga bwe wabingagho amaghanga agandi mu bifo byago n'oizaamu abantu bo, nga bwe wadaazadaaza amaghanga ago era n'osobozesa abantu bo okukulankulana.

³ Abantu bo tibaakozesa mafumo gaibwe okughangula ensi mwe bali, oba okukozesa amaani gaibwe okufuna obughanguzi. Aye amaani go n'obukumu bwo, era n'obukakafu bwo bwe wabagha oti oli ghalala nabo, n'ebyabalaga nga bw'obagonza.

⁴ Niiwe Kyabazinga wange era Katonda wange, niiwe asobozesa Yakobo okughangula.

⁵ Bwetubita mu iwe tusindika ere abazigu baife, era mu liina lyo tutyankirira abatulumbagana.

⁶ Nze tyesiga kalaso kange, n'eifumo lyange tirisobola kumponia.

⁷ Aye niiwe owatuwonia abazigu baife, era waaswaza abo boonaboona abatukyagha.

⁸ Twenhumiririza mu iwe Katonda buliidho, era tunaakusiimanga ebyanda n'ebyanda.

⁹ Aye ate buti otusuuliriire era waatuleetera okuswala. Tokaaja na igye lyaife nga lija okulwana olutalo.

¹⁰ Otuleeteire okukyuka twalumuka abazigu baife, abazigu abo baatwala ebyaife ng'omunhago.

¹¹ Watuleka baatwita ng'oti ntaama, watusansaaniza mu maghanga agandi.

¹² Abantu bo waabatundamu akaghendo akazira ghe kaaga, waaloba kufunamu magoba naire.

¹³ Otufiire ekivume eri ab'oku muliiraano, baatusekerera era baatuyeeyereza.

¹⁴ Otufiire ekibono eky'okudhondha mu bamaghanga agandi; baatukanta era baatwesiimooza.

¹⁵ Nnhoomebwa olunaku lwonalwona, era tikaayala mu bantu,

¹⁶ olw'abazigu bange n'abo abankyagha okundheeyereza n'okunvuma.

¹⁷ Bino byonabyona bitutuuseeku, waire nga titukwerabiranga, oba okumenha endagaano ye wakola n'ife.

¹⁸ Titulobangaku kujiira ku biragiro bye watugha, waire okudaaliima okuva mu ngira ye watugemya.

¹⁹ Aye otutenteine era waatuleka mu nsolo edh'omu nsiko, mu nzikiiza eri bedimudimu.

²⁰ Ngoli twali tulekeire agho okusinza Katonda waife, oba ni tukuba amakiryaivu okusaba katonda ow'amaghanga agandi,

²¹ Katonda waife oyo yandirobye okumanha, ate nga aidhi n'ebyama ebiri mu myoyo gyaife?

²² Busa naire, kuba ku lulwo twitibwa omusana n'obwire; tuli ng'oti n'entaama edhija okwitibwa.

²³ Wo Musengwa Katonda, zuuka! Lwaki otenduka? Situka! Otatusuula ere n'otwerabirira irala!

²⁴ Lwaki otwegisaaku? Lwaki oleka ni batukiriga era ni batudaazadaaza?

²⁵ Batufuuta mu itaka baatutentena, twasigala agho nga twegolomoire gatuwoire.

²⁶ Situka oidhe otubeere! Tulokole olw'okuba otugonza obutalekera.