Zabbuli 42 - Baibuli Ekibono kya Katonda 2014

Ekitabo ekyokubiri Zab 42—72 Okusaba okw'omuntu eyaghatira mu bunhage

¹ Ng'empongo bweyeegomba okutuuka ku mwiga ogw'amaadhi amainhogovu, zeena ntyo bweneegomba okutuuka gh'oli, iwe Katonda wange.

² Ng'omuntu ali n'endiwo bw'aba, zeena ntyo bwe nhenda einho okuba iwe Katonda wange gh'oli, Katonda iwe omulamu. Ndituukaku li mu maiso go ni nkubona?

³ Omusana n'obwire, okulira amaziga n'okwafuuka emere yange, eno abantu nga tibalekera kundheeyereza bati: “Katonda wo ali gha?”

⁴ Omwoyo guunuma bwe ndidhukira eby'eira, bwe nakulemberangamu olukunkumuli olw'abantu abali ku kibinuko, nga tuja mu ndhu ya Katonda nga tuja bwe tukuba emizira era nga bwe twemba enhembo edh'okwebaza Katonda.

⁵ Aye neebuuza nti: “Lwaki omwoyo gungwa mu bigere? Era lwaki mbula emiraala? Ka nsuubire mu Katonda, luliba lulala nairamu okumusaaka,

⁶ oyo ni Katonda wange era n'ambeera.” Wo Katonda wange, omwoyo gundi mu bigere, aye nkwidhukira nga ndi mu biketezo by'e Yorudani, n'e Herimoni, ni ku lusozi Mizari.

⁷ Iwe oleetera amaadhi okwefuukuula, gaatyabuka oti lukuba, era geekuluumulula, nga genda kuumira.

⁸ Omusana Musengwa Katonda andholeka nga bw'angonza obutalekera, obwire nze naamwembera olwembo nga mmusaba oyo Katonda ampa obulamu.

⁹ Nze nkoba Katonda wange, oyo olubaale mwe neegisa, nti: “Lwaki oneerabiire? Lwaki ondekera abazigu okundiza amaziga nga bandaazadaaza?”

¹⁰ Abazigu bange, bandi ng'oti ibwa lya ku mwoyo. Bandheeyereza n'ebivumo, eno bwebandeeba buli kiseera, bati: “Katonda wo ali gha?”

¹¹ Aye neebuuza nti: “Lwaki omwoyo gungwa mu bigere? Era lwaki mbula emiraala? Ka nsuubire mu Katonda, luliba lulala nairamu okumusaaka, oyo ni Katonda wange era n'ambeera.”