Zabbuli 41 - Baibuli Ekibono kya Katonda 2014

Okusaba okw'omulwaire

¹ Wa nkabi oyo afaayo ku baavu, Musengwa Katonda aidha kumutoolanga mu bizibu, ng'ali mu biseera ebizibu.

² Musengwa Katonda aidha kumukuuma nga mulamu, aidha kwetebwanga wa nkabi mu nsi. Musengwa Katonda talimulekulira agho bazigu be kumukola nga bwe benda.

³ Musengwa Katonda n'alimugenza ng'alwaire, yaamuwonia kiisi kimuluma.

⁴ Nze naakoba nti: “Wo Musengwa Katonda idha ondhune, ndidhi nga nayona, naakusungughaza, aye mala gamponia.”

⁵ Abazigu bange baneeguguna, bandhogeraku bubi, bati: “Alifa li ni yeerabirwa?”

⁶ Abaidha okumbona, mu kifo ky'okunsaasira boogera biziramu, baidha kubona bwendaaga olwo bafune eky'okughayaku buli ghe baja.

⁷ Boonaboona abataanhenda bandhogeraku mu bwama, baakola entegeka ey'okuntuusa ku buzibu.

⁸ Bakoba bati: “Obulwaire bw'alwaire tibwakuwona, era taja kuva ku ndiri.”

⁹ Ni mukagwa wange mwene ow'omukago ye nali neesiga era ye nalyanga naye, yeena aneefuuliire.

¹⁰ Aye iwe Musengwa Katonda, idha ondhune, ontoole mu bulwaire buno, memale mbeesasuulizeeku bye bankola.

¹¹ Ndidhi ng'abazigu tibaidha kumpangula, era ekyo kiidha kundaga nga bw'osiima bye nkola.

¹² Ndidhi nga toidha kubaganha kunsuula, kuba nkola by'oyenda. Era oidha kunkuumira gh'oli ebyanda n'ebyanda.

¹³ Musengwa Katonda asaakibwe, Katonda wa Isiraeli! Asaakibwe buti era n'ebyanda n'ebyanda! Amiina era Amiina!