Zabbuli 40 - Baibuli Ekibono kya Katonda 2014

Okusaaka n'okusaba Musengwa Katonda

¹ Eisuubi lyange lyonalyona nalita mu Musengwa Katonda era yaatega kutu yaawulira okulira kwange.

² Yaanhinhulula mu lwina olw'okufa, yantoola mu bitosi eby'olutente, yaanhemereza ku lubaale, naatambula nga ndi mugumu.

³ Yandeetera okumwembera olwembo oluyaaka, olwembo olw'okusaaka Katonda waife. Abantu kamaala balibona kino baatya, era baata obwesige bwaibwe mu Musengwa Katonda.

⁴ Ba nkabi abo abeesiga Musengwa Katonda, abatakyuka ni basinza bitali Katonda waire okweyimba ku abo abasinza emisambwa.

⁵ Wo Musengwa Katonda waife, otukoleire ebintu kamaala ebyewuninkiriza, era ezira akutuukaku mu ngeri y'otuyiiyizaamu. Ni bwengezaaku okubyogeraku n'okubibala, biri kamaala tibibalika.

⁶ Emisengo, n'ebigheebwayo tobyegomba, era tosabangaku bigheebwayo byokebwa byonabyona kuwaagho, waire ebigheebwayo olw'okusoniyisa ebibi. Aye nze wampa amatu okukuwuliranga.

⁷ Agho naakoba, nti: “Bona, ndidhie; ebinfaaku byaghandiikibwa mu nzingo y'ekitabo.

⁸ Wo Katonda wange, nhenda inho okukola by'oyenda, era amateeka go gandi ku mwoyo.”

⁹ Naja mu bantu bo abeesoloiza okukusinza, naabakobera amawulire amalungi ag'okulokolwa. Wo Musengwa Katonda, nga bw'oidhi tija kulekera kugalangirira.

¹⁰ Tyasirikira mu mwoyo gwange mawulire malungi ag'okulokolwa. Buliidho nkobera abantu ku bwesigwa bwo ni ku buyambi bwo. Era nga ndi mu bantu bo abeesoloiza okukusinza, tyaloba kwogera ku kugonza kwo okutakoma, ni ku bwesigwa bwo.

¹¹ Wo Musengwa Katonda, otalekera kunsaasiranga, nkuumanga buliidho olw'okugonza kwo okutakoma n'olw'obwesigwa bwo.

¹² Ebizibu kamaala bineezungulwire, tibibalika na kubalika. Ebibi byange bimbitiriireku obungi, buti tibinganha na kubona. Obungi bwabyo businga enviiri edhiri ku mutwe gwange, n'amaani gampoiremu.

¹³ Wo Musengwa Katonda, mponia, yangughaku ombeere, Musengwa Katonda.

¹⁴ Abo abenda okundhita, baswaze era basoberwe. Abo abenda okuunumya, bairirizeeyo era banhoomebwe.

¹⁵ Abo abansungiriza baleetere okwezinduka, olw'okubona nga baswaziibwa.

¹⁶ Aye abo boonaboona abeefubiriza okwidha y'oli, ka basagambe era basangaale olw'ebyo by'obakolera; n'abo abeegomba obulokozi bwo, ka bakobenga buliidho bati: “Musengwa Katonda mukologho.”

¹⁷ Aye nze waire ndi munaku era omwavu, Musengwa Katonda taneerabira. Wo Katonda wange, niiwe ombeera era ontoola mu bizibu, yangughaku ombeere!