Zabbuli 4 - Baibuli Ekibono kya Katonda 2014

Okusaba n'obwesige

¹ Katonda wange, iwe aidhi obutuufu bwange ndi kukweta otansiriikirira. Bwe nali ghagati mu buzibu, wanteewuluza. Idha ondhune, owulirise okusaba kwange.

² Bantu imwe, mulirekera li okusiiga eriina lyange enziro? Mulirekera li okugonza ebiziramu muganhulo, n'okujiira ku buguya?

³ Aye mukimanhe, nga Musengwa Katonda yeeronderayo, era yeekuumira abo abamutya. Musengwa Katonda ampulira bwe mmweta.

⁴ Bwe musungughala, obusungu butabasindikanga mu kwona. Mwefumintirize ku kino mu myoyo gyaimwe, nga muli mu buliri mulambaire.

⁵ Mughengayo emisengo mu butuufu, era mwesigenga Musengwa Katonda.

⁶ Abantu kamaala bakoba bati: “Wo! Tugwana twafuna bikalamu byereere! Wo Musengwa Katonda, tulingeku n'amaiso ag'ekisa!”

⁷ Aye iwe eisanhu ly'ompaire mu mwoyo gwange lisinga ery'abo lye baba nalyo, nga bali mu mwero gw'emere yaibwe, n'ogw'omwenge ogw'emizabbibu.

⁸ Bwe nambaala, ntenduka n'emiraala, kuba niiwe Musengwa Katonda wenka onkuuma obukalamu, ni ghabula akantuukaku naire.