Zabbuli 39 - Baibuli Ekibono kya Katonda 2014

Okwenenia okw'omuntu adaazibwadaazibwa

¹ Nakoba nti: “Ndidha kwegenderezanga mu bye nkola, ndobe kuganha lulimi lwange kunsuula mu kibi. Omunwa gwange ndidha kugutangaku kuufulu, kasita ghanaabangagho abakozi b'ebibi.”

² Nasirika ng'oti ni kasiru, nga waire ekirungi tikyogeraku! Aye obuzibu bwange nga bweyongera bweyongere,

³ omwoyo gwaneeghanika. Ye nakoma okudhuubiriza, n'omwoyo ye gwakoma okuneeghanika. Agho n'okukoba nti:

⁴ “Wo Musengwa Katonda, nkusaba ommanhise enkomerero yange n'ekigero ky'enaku dhange, mmanhe obumpi bw'obulamu bwange.”

⁵ Bona, enaku dhange wadhikola nga nhimpi inho mu maiso go, obulamu bwange buli ng'akantu akazira ghe kaaga. Bwenebwene buli muntu ali ku nsi, ali ng'oti muuka buuka gwa mu nhindo!

⁶ Buli muntu ali ng'oti kinsense! Atawuka, yaazunga, aye nga byonabyona bya bwereere. Omuntu atakabana okufuna eby'obukombe, aye nga taidhi aja kubitwala.

⁷ Wo Musengwa Katonda, nze nzira kindi kyonakyona kye neesiga, mu iwe mwe nsuubirira.

⁸ Ntoola mu kwonoona kwange kwonakwona, omponie okufuuka enseko dh'abasiru.

⁹ Ka nsirike, tiidha kwogera kibono kyonakyona, kuba okudaagadaaga kwange kuva y'oli.

¹⁰ Ntoolaaku obulwaire buno, mbulaku bwa katono okufa olw'omukono gwo okunkuba einho.

¹¹ Iwe okangaivula omuntu ng'omudhuuka olw'ebibi bye, era omuntu ky'atwala okuba eky'omughendo iwe okizikiriza, ng'oti n'ekintu ekiriiriibwa ekisiisa. Bwenebwene buli muntu muuka buuka gwa mu nhindo!

¹² Wo Musengwa Katonda, ndhiraamu okusaba kwange era ofeeyo ku kulira kwange. Idha ombeere ng'oboine amaziga gange, kuba nze ndi musenze busenze, nga badhaadha bange boonaboona bwe baali.

¹³ Otaaningirira na bukambwe, ndeka nfuneku eisanhu, nga nkaali kufa na kubulagho.