Zabbuli 38 - Baibuli Ekibono kya Katonda 2014

Okusaba okw'omulwaire ali obubi

¹ Wo Musengwa Katonda, otandhuuka na busungu era otankangaivula na kiruyi.

² Onfumiite n'obulaso bwo era wankuba n'omukono gwo.

³ Ku mubiri gwange kuzira ghalamu olw'obusungu bwo; ni ku magumba gange kuzira iramu olw'ebibi byange.

⁴ Ebibi byange byebunze emungo ensinga n'obuleeyi, era bizitogha inho tisobola na kubibbeeda.

⁵ Amabwa gange gavunda era gaaduuka olw'obusiru bwange obwandeetera okudaaliima.

⁶ Ti kaali na maani geemerera, nja bwe ngwa; olunaku lwonalwona nsiiba nga ndira.

⁷ Mpulira okwokerera mu nkende, era ku mubiri gwange kuzira ghalamu.

⁸ Banteinteine inho era amaani gampoire; mu mwoyo nzira idembe, mba bwagho naawologoma n'obulumi.

⁹ Wo Musengwa Katonda, kye neegomba okiidhi bukalamu, okusinda kwange kwonakwona okuwulira.

¹⁰ Omwoyo gumpakukapakuka, amaani gampoire, amaiso gange tigakaabona bulungi.

¹¹ Bakagwa bange be nabitanga nabo buti tibenda na kuseeta ye ndi olw'obulwaire obwantuukaku, n'abekika kyange beene buti baba bw'ere.

¹² Abo abenda okundhita bantega entuula dhaibwe; abo abenda ngwe mu bizibu beekobaana bwe banaakola okunzikiriza, olunaku lwonalwona baalumala nga bategeka bwe banandyamu olukwe.

¹³ Aye nze mba agho ng'oti ndi musigha atabawulira, era naaba ng'oti ndi kasiru atasobola kwogera.

¹⁴ Bwenebwene mba ng'oti n'omuntu atawulira era azira kya kwiramu.

¹⁵ Aye nze, niiwe ye neesiga. Iwe Musengwa Katonda wange niiwe oidha okumpa kye nkusaba.

¹⁶ Nkusaba nti otabaganha kusagamba lwa nze okuba aghazibu, era otabaganha kusagamba nga ntyereire ni ngwa.

¹⁷ Kuba ndi kumpi n'okugwa, n'obulumi bulobye okundekula.

¹⁸ Neenenia olw'ebibi byange, era bingemya enaku.

¹⁹ Abo abeefuula abazigu bange aghazira nsonga ntuufu, balamu era ba maani, n'abo abankyagha nga ghazira kye mbakoze bali kamaala.

²⁰ Abo abansasulamu ebibi nga mbakoleire ebikalamu, bazigu bange; kuba nze ngezaaku okukola ekituufu.

²¹ Wo Musengwa Katonda, otandekulira agho! Niiwe Katonda wange, otamba ghala!

²² Yangughaku okumbeera, iwe Musengwa Katonda era omulokozi wange.