Zabbuli 37 - Baibuli Ekibono kya Katonda 2014

Ebituuka ku babi ni ku balungi

¹ Tofangayo ku babi, oba okwesiimisanga abakola ebibi,

² kuba amangu n'embiro baja kuwaagho ng'oti isubi, baniale ng'oti n'ebimera.

³ Weesige Musengwa Katonda era okole ebirungi, oidha kuba bukalamu mu nsi era ghabule ekikweraliikiriza.

⁴ Eisanhu lyo lyagalire mu Musengwa Katonda, aidha kukugha omwoyo gwo bye gwenda.

⁵ Eneebisa yo gigemye Musengwa Katonda, omwesige aidha kukubeera.

⁶ Aidha kwoleka nga bw'oziraku omusango, n'obutuufu bwo bumesunkane ng'endhuba ey'omu kasana ghagati.

⁷ Sirikanga ng'oli aghali Musengwa Katonda, oteegerere ky'anaakola. Ole ebintu ni bwebimujiira obukalamu, oba n'afuna ebintu ng'abita mu magira amabi, otafangayo.

⁸ Weesambenga ekiruyi, olekenga n'obusungu n'okweraliikirira, byonabyona bivaamu bibi,

⁹ kuba ababi baja kuwaagho aye abo abasuubirira mu Musengwa Katonda balitwala ensi.

¹⁰ Mu kaseera katono ababi baja kuwaagho, nga ni bw'obaagala ghe baalinga tobabona.

¹¹ Aye abo abawombeefu balitwala ensi, era baaba miraala ng'ebintu bibajiira bukalamu.

¹² Omubi yeesoomera okukola omuntu omutuufu obubi era amweguguna.

¹³ Aye Musengwa Katonda asekerera omubi, kuba aidhi ati olunaku lwe tiruli ghala.

¹⁴ Ababi basowolayo empiima dhaibwe, era baadhuumuula obulaso bwaibwe okusuula abanaku n'abaavu, n'okwita abo abagondera ebiragiro bya Katonda.

¹⁵ Aye empiima dhaibwe dhirifumita myoyo gyaibwe beene, n'obulaso bwaibwe bulimenhekamu.

¹⁶ Akantu akatono omuntu omutuufu k'ali nako, kasinga ekyodoodo ky'ebyo ababi abangi bye baba nabyo;

¹⁷ kuba Musengwa Katonda aja kuzikiriza amaani g'ababi, aye abeere abo abatuufu.

¹⁸ Musengwa Katonda alabirira abaziraku musango, era omugabo gwaibwe gwa kutwala nsi ebyanda n'ebyanda.

¹⁹ Waire mu biseera ebizibu tibadaagadaaga, endhala bw'egwa beene baba mu mwero.

²⁰ Aye ababi baja kufa; abazigu ba Musengwa Katonda abo baja kuwaagho mangu ng'oti munhiriro gwa isubi, era ng'oti n'omwosi bwegubulagho.

²¹ Omubi bwe yeewola tasasula, aye omutuufu aba mugabi nga ti mukenge.

²² Abo Musengwa Katonda be yagha enkabi dhe baja kutwala ensi, aye abo be yakolimira baja kuwaagho.

²³ Musengwa Katonda alabirira obulamu bw'omuntu, era oyo akola Musengwa Katonda by'ayenda, Musengwa Katonda amukuuma.

²⁴ Ni bw'agwa, taja kuweera ku itaka, kuba Musengwa Katonda amugema ku mukono.

²⁵ Okuva mu buto, buti nkairiighe, aye tibonangaku nga Musengwa Katonda alekulira agho omutuufu, waire okubona ng'abaana ab'omutuufu basabiriza.

²⁶ Omuntu ng'oti n'oyo aba mugabi inho ng'awola n'abantu abandi, era eizaire lye limuleetera okuba ow'enkabi.

²⁷ Lekera agho okukola ebibi, okole ebikalamu, oidha kuba ku nsi ebyanda n'ebyanda.

²⁸ Kuba Musengwa Katonda ayenda inho ekituufu kikolebwe, era taja kulekulira agho abo abamutya. Taja kuganha kibi kutuuka ku bantu batuufu ebyanda n'ebyanda aye eizaire ly'ababi lija kuwaagho.

²⁹ Abatuufu baja kutwala ensi era bagibeeku ebyanda n'ebyanda.

³⁰ Omunwa ogw'omuntu omutuufu gwogera bya magezi, era olulimi lwe lwogera bituufu.

³¹ Amateeka ga Katonda we tigamuva ku mwoyo, era mw'atambulira aghazira kudaaliima.

³² Omubi yeeteega omuntu omutuufu nga ayenda amwite.

³³ Aye Musengwa Katonda taja kumulekera muzigu oyo amukole ky'ayenda, waire okumuleka bamusalire omusango okumusinga ng'ali kuwozesebwa.

³⁴ Weesige Musengwa Katonda okolenga nga bw'alagira, aja kukugha ekitiisa otwale ensi, era obone ng'ababi bawaagho.

³⁵ Ghaligho omuntu omubi ye nabona ng'atiisa abantu boonaboona baadhugumira, era ng'abaswikiriire boonaboona ng'oti n'emivule egy'omu Lebanoni emireeyiriri.

³⁶ Aye olundi naja okubitayo nga takaaliyo, naamwagalaku aye naaloba kumubona.

³⁷ Weekalirisenga omuntu aziraku musango era omutuufu; omuntu ayenda emiraala tabula izaire.

³⁸ Aye abo abamenha amateeka ga Katonda baja kuzikirizibwa baweegho, n'eizaire lyaibwe lyeyebwegho.

³⁹ Musengwa Katonda alokola abo abatuufu, era abakuuma mu biseera ebizibu.

⁴⁰ Ababeera era yaabawonia ng'abatoola mu ngalo dh'ababi, kuba bamwesiga.