Zabbuli 36 - Baibuli Ekibono kya Katonda 2014

Omuntu mubi aye Musengwa Katonda mulungi

¹ Omwonooni awulira mule ng'ekibi kyogera naye, era tatya Katonda naire;

² kuba yeebona nga wa ghaigulu inho, era nga ghazira asobola kumanha bibi bye na kubivumirira.

³ Byonabyona by'ayogera byoleka itima na buguya; by'akola tibikaali bya magezi waire okuba ebirungi.

⁴ Akola entegeka ey'okukola eby'eitima ng'ali mu buliri, yaasituka nga ghazira kirungi kye yeetegeike kukola, era ghazira kibi kimugemya ntete kukola.

⁵ Aye iwe Musengwa Katonda okugonza tikukoma era kugungumavu okutuuka mu igulu, ate obwesigwa bwo butuuka mu bire.

⁶ Obutuufu bwo bugulumivu ng'oti nsozi, ate ensala yo ey'amazima eika yaatuuka ku ntobo ey'enhandha. Niiwe owonia abantu n'ensolo obutagwa mu kabi.

⁷ Okugonza kwo okutakoma nga kwa mughendo inho! Oghambaatira abaana b'abantu ng'oti n'enkoko bw'eghambaatira obwana bwayo.

⁸ Batoola ku bungi bw'emere eri mu ndhu yo baakola embaga, era baafuna ku birungi byo ebikuuluula ng'oti mwiga.

⁹ Kuba niiwe oli n'ensulo ey'obulamu, era mu butangaavu bwo mwe tubonera obutangaavu bwene.

¹⁰ Otakomya kugonzanga abo abakutegeera, waire okulekera okulokolanga abo abagondera ebiragiro byo.

¹¹ Otaganha abo abeetwala okuba aba ghaigulu kwidha kuunumba; waire okuleka ababi abo okuuminga gh'oli.

¹² Bona, ababi bali ku itaka, bagwire baaloba kusobola kusituka.