Zabbuli 35 - Baibuli Ekibono kya Katonda 2014

Okusaba kw'omuntu ye bakiriga

¹ Wo Musengwa Katonda, balumbe abo abaanumbagana, balwanise abo abaanwanisa.

² Gema engabo enene n'entono, ositukiremu oidhe ombeere.

³ Bbeeda amafumo aga buli nsambo, ogoolekeze abo abaamingirira. Onkobere oti oidha kumponia abazigu.

⁴ Abo abayiiga obulamu bwange baswaze era banhoomebwe! Era oyemereze abo ababaire baidha n'entegeka ey'okuunumba, obairirizeeyo nga n'okutegeera tibategeera.

⁵ Malaika wa Musengwa Katonda k'abasindiikirize, babe ng'oti musinsi empewo gw'efuuwa obw'ere.

⁶ Ka baje mu nzikiiza ni mu butyerezi, nga malaika wa Musengwa Katonda ababingirira.

⁷ Bantega olutuula mu nkweko aghazira nsonga, era baasima ebiina okuntega nga nzira kye mbakoze.

⁸ Aye ka batuuke ku kuzikirizibwa nga tibaidhi, olutuula lwe baagisa lugemye beene abo, balugwemu bazikirire.

⁹ Olwo ndisagamba olwa Musengwa Katonda, era naasangaala kuba yandokola.

¹⁰ Ndisaaka Musengwa Katonda n'amaani gange goonagoona, nti: “Wo Musengwa Katonda, naani ali ng'oti niiwe? Iwe atoola omunafu n'omuwonia ow'amaani amuswikirira, era atoola omwavu n'omuwonia amunhagaku ebibye?”

¹¹ Abadhulizi abaguya basituka bampaama ebintu bye ntaidhiiku naire.

¹² Bwe mbakolera ebirungi bansasulamu bibi, baaleetera omwoyo gwange okuwaamu amaani.

¹³ Ate nga beene bwe baali abalwaire, nze nanakughala, neerumya nga nsiiba endhala, naasaba nga nkotaimya omutwe,

¹⁴ ng'oti nsabira mukagwa wange oba muganda wange. Naatambula n'amakono ku mutwe ng'oti n'alira inhina.

¹⁵ Aye lwe nagwa mu bizibu, beene baasangaala busangaale, beesoloza, baaneezungulula, bankongoola, ni be nali tiidhi bankuba nga tibalekera naire.

¹⁶ Beekalangula okunkiina ng'oti n'abatatya Katonda bwe bakola, baaningirira nga baneeguguna.

¹⁷ Wo Musengwa Katonda, onaabalingirira obulingirire otyo kutuuka li? Mponia obukambwe bwaibwe era owonie obulamu bwange empologoma edho!

¹⁸ Olwo ndikusiima nga ndi mu bantu bo abeesoloiza okukusinza, era naakusaaka nga ndi mu ikuukuubira ery'abantu.

¹⁹ Abo abeefuula abazigu bange aghazira nsonga ntuufu, otabaganha kusagamba lwa kugwa kwange, era abo abankyagha nga ghazira kye mbakoze, otabaikiriza kunhiira maiso gaibwe kunsekerera.

²⁰ Tibakolerera miraala, okutoolaku okughaayira ebibono ku abo abeebeera obwagho ni beesirikira.

²¹ Baanangira ebintu bye ntakola nga bakoba bati: “Otyo, otyo! Tukuboine!”

²² Aye iwe Musengwa Katonda oboine bino, otaloba kumpulira! Wo Musengwa Katonda, otamba ghala!

²³ Situkiramu onwanirire, yemereragho ompolezeegho niiwe Katonda wange era Musengwa Katonda wange!

²⁴ Sala omusango oyoleke nga bwe nziraku musango, kuba iwe oli mutuufu, era otabaganha kusagamba lwa kugwa kwange.

²⁵ Otabaganha kukoba bati: “Otyo, kye tubairenga twenda buti tukituuseeku!” Nga bakoba bati: “Oyo buti awoire!”

²⁶ Abo abasagamba ng'ebizibu bingwireku, batabule emitwe era obaswaze. Abo abaneekulumbalizaaku baswakize irala era banhoomebwe.

²⁷ Aye abo abasangaala okumbona nga nziraku musango, ka bakube emizira nga basagamba. Era baatule emikuzi kamaala nga Musengwa Katonda bw'ali omukologho era nga bw'asangaala buli mugheereza we lw'aba obukalamu.

²⁸ Olwo ndidha kulangiriranga nga bw'oli omutuufu, era nkusaakenga olunaku lwonalwona.