Zabbuli 34 - Baibuli Ekibono kya Katonda 2014

Okusaaka Katonda nga bw'ali omulungi

¹ Ndidha kusiimanga Musengwa Katonda ebiseera byonabyona, tija kulekera kumusaakanga.

² Nze neenhumiriza mu Musengwa Katonda, imwe abadaazibwadaazibwa muwulire era musangaale.

³ Muneeyimbeku twatule nga Musengwa Katonda bw'ali omukulu, era tusaakire ghalala eriina lye.

⁴ Nasaba inho Musengwa Katonda yankolera kye nayenda, yamponia okutya kwonakwona.

⁵ Abo abadaazibwadaazibwa oyo ye beesiga era baasangaala, taja kubaleka kuswala.

⁶ Omuntu omunaku Musengwa Katonda amuwulira yaamuwonia, yaatoolagho ebizibu bye byonabyona.

⁷ Malaika wa Musengwa Katonda akuuma abo abatya Musengwa Katonda, yaabawonia ebizibu.

⁸ Mwidhe mubone Musengwa Katonda nga bw'ali omulungi! Ba nkabi abo abamwesiga!

⁹ Mutye Musengwa Katonda imwe abamusinza, kuba abo abamutya ghazira kye badhulirira.

¹⁰ Ni bwedhiba empologoma edh'amaani dhibula emere, aye abo abasaba Musengwa Katonda tibabulwa kintu kirungi.

¹¹ Mwidhe baana bange mumpulirise, ndidha kubeegeresa okutya Musengwa Katonda.

¹² Naani oyo ayenda okufuna obulamu, era eyeegomba okughangaala nga musangaavu?

¹³ Akuume olulimi lwe lulobe kwogera bibi, n'omunwa gwe gulobe kwogera bya buguya.

¹⁴ Ave mu kukola ebibi akole ebituufu, anoonie eidembe era alitambuliremu.

¹⁵ Amaiso ga Musengwa Katonda tigava ku batuufu, era talekera kuwulirisa kusaba kwaibwe.

¹⁶ Aye abo abakola ebibi abakambughalira, bwe bafa abantu ab'oku nsi baabeerabira.

¹⁷ Abatuufu bwe basaba okubeerwa, Musengwa Katonda abawulira yaabawonia, era yaatoolagho ebizibu byaibwe byonabyona.

¹⁸ Abo abawoiremu amaani, Musengwa Katonda tabasuulirira, era alokola abo abaweireiremu irala eisuubi.

¹⁹ Ebizibu ebigwa ku batuufu biri kamaala, aye Musengwa Katonda abawonia yaatoolagho ebizibu byaibwe byonabyona.

²⁰ Akuuma amagumba gaibwe goonagoona, ghaabula erimenhekaku waire eirala liti.

²¹ Aidha kuleetera omukozi w'ebibi okufa olw'ebibi bye, era abo abakyagha abantu abatuufu abasalire omusango gubasinge.

²² Musengwa Katonda anunula obulamu bw'abagheereza be, ghazira ku abo abamwesiga aja kusalirwa musango kumusinga.