Zabbuli 33 - Baibuli Ekibono kya Katonda 2014

Okusaaka Musengwa Katonda omutonzi era omukuumi

¹ Imwe abatuufu musagambe olw'ebyo Musengwa Katonda by'akola; kituufu okumusaaka imwe abagondera ebiragiro bye.

² Mukube endingidi nga musaaka Musengwa Katonda, mutabulemu n'entongooli ey'enkosi eikumi.

³ Mumwembere olwembo oluyaaka, mukube ebivuga n'obukugu muteeku n'emizira egy'amaani.

⁴ Musengwa Katonda kiisi ky'akoba akituukiriza, era kiisi ky'akola kyoleka nga bw'ali omwesigwa.

⁵ Ayenda abo abakola ebituufu n'abo abatasaliriza; okugonza kwa Musengwa Katonda eri abantu tikukoma.

⁶ Musengwa Katonda yalagira eigulu lyakolebwa; ebiririmu byonabyona byakolebwa olw'ekibono kye.

⁷ Yasololeza amaadhi ag'enhandha goonagoona ghalala; amaadhi ag'oku ntobo y'enhandha yaagakuumira ghalala, ng'oti n'omuntu bw'atereka ebintu bye mu byagi.

⁸ Ensi yoonayoona etyenga Musengwa Katonda! Kiisi kiri ku nsi kimughe ekitiisa;

⁹ kuba yayogera bwogere ensi yaabaagho, yaalagira bulagire buli kintu kyabaagho.

¹⁰ Amaghanga bwe geekobaana, Musengwa Katonda yaagalemya; abantu bwe bategeka ebyaibwe Musengwa Katonda abitabulatabula.

¹¹ Aye mwene bw'ategeka ebibye bituukirira ebyanda n'ebyanda; ebidhuubo bye bisigalagho ense n'ense.

¹² Eighanga eriri ni Musengwa Katonda nga ni Katonda waalyo, lya nkabi; abantu Musengwa Katonda b'alonda okuba ababe, ba nkabi.

¹³ Musengwa Katonda aba mu igulu yaalinga ghansi, yaabona abantu boonaboona.

¹⁴ Ng'ali ku kityamo kye eky'obwakyabazinga, alingirira abantu boonaboona ababa ku nsi.

¹⁵ Oyo eyawumba emyoyo gy'abantu boonaboona, ategeera byonabyona bye gikola.

¹⁶ Kyabazinga okuba n'eigye ery'amaani ti n'ekimuwonia okughangulwa, ate omulwani okuba n'amaani kamaala ti n'ekimuleetera okughangula.

¹⁷ Ole aba yeerimba bw'asuubira okughangula olutalo n'embalaasi; amaani gaayo amangi tigasobola kumuwonia.

¹⁸ Bona eno, Musengwa Katonda alabirira abo abamutya, era abo abasuubirira mu kugonza kwe okutakoma

¹⁹ abawonia okufa, yaabakuuma nga balamu mu biseera eby'endhala.

²⁰ Eisuubi lyaife liri mu Musengwa Katonda; oyo n'atubeera era oyo n'engabo yaife.

²¹ Bwenebwene emyoyo gyaife misangaavu olwa Musengwa Katonda, kuba twesiga eriina lye eitukuvu.

²² Wo Musengwa Katonda, tugonzenga obutalekera, ng'eisuubi lyaife lyonalyona bwe liri mu iwe.