Zabbuli 32 - Baibuli Ekibono kya Katonda 2014

Okwatula ebibi n'okusoniyibwa

¹ Wa nkabi oyo asoniyibwa ebyonoono bye, ebibi bye ni bimutoolebwaku.

² Wa nkabi oyo Musengwa Katonda y'abala ng'azira kibi, era nga mu mwoyo gwe muzira buguya.

³ Bwe nali nkaali kwatula bibi bye nakolanga nagoogomba, kuba nawologomanga olunaku lwonalwona.

⁴ Wambonerezanga omusana n'obwire, amaani gampweramu irala ng'oti n'ebisimbe bwe bikala okw'endoboozi.

⁵ Agho naayatula y'oli ebibi bye nakolanga, era naaloba kukugisa mikuzi gye nayonoonanga. Naakoba nti: “Nteekwa okwatula okwonoona kwange ye Musengwa Katonda.” Agho weena wansonigha omusango ogw'ebibi bye nakola.

⁶ Kyenva ni nkoba kiisi akutya, akusabenga mu biseera eby'enaku, olwo ebizibu ebyekuluumulula ng'oti mwiga gwa mwidhuzo lwe bitalimutuukaku.

⁷ Oli kifo kyange mwe neewogoma, niiwe omponia ebizibu wandhidhuza eisanhu olw'okuwonezebwa.

⁸ Musengwa Katonda ankoba ati: “Ndidha kukugalagiranga era nkwegerese ensambo ey'okwebisaamu, era ndidha kukulagiriranga nga nkulabirira.

⁹ Otabanga ng'embalaasi oba enhumbu edhizira kutegeera, edhitasobola kukola muntu ky'ayenda, okutoolaku nga adhisibyemu ekyuma mu kanwa n'enkoba mu kifuba, memale ni dhikola ky'ayenda.”

¹⁰ Ebizibu ebiidhira ababi biri kamaala, aye Musengwa Katonda agonza abo abamwesiga n'okugonza okutakoma.

¹¹ Imwe abatuufu musangaale era musagambe olw'ebyo Musengwa Katonda by'akola. Imwe abagondera ebiragiro bye, mukube emizira.