Zabbuli 31 - Baibuli Ekibono kya Katonda 2014

Okusaba nga weesigira irala Katonda

¹ Wo Musengwa Katonda, niiwe ye neesiga otandeka kuswala. Niiwe Katonda ow'obutuufu, nkusaba ondokole.

² Tega kutu ompulirise, yangughaku omponie, onfuukire olubaale olw'okwewogomamu era ekimante ekigumu ekineezungulwire eky'okumponia.

³ Bwenebwene oli ng'oti lubaale era ng'oti kimante kigumu mwe neewogoma; ku lw'obulungi obw'eriina lyo ngema ku mukono ombise aghabi.

⁴ Mbisa aghalungi ndobe kugwa mu lutuula lwe banteze, kuba niiwe ye neesiga.

⁵ Ntaire obulamu bwange mu ngalo dho, kuba onnunwire, niiwe Musengwa Katonda omwesigwa.

⁶ Toyenda abo abeesiga ebisinzibwa ebitali Katonda, ebizira muganhulo, aye nze neesiga iwe Musengwa Katonda.

⁷ Ndidha kusangaalanga era nsagambenga olw'okugonza kwo okutakoma; kuba obona okudaazibwadaazibwa kwange, era ofaayo ku bizibu byange.

⁸ Toganhie bazigu bange kuntuukaku, era ompaire eidembe neetaaya.

⁹ Wo Musengwa Katonda, nkusaba ondhune, kuba ndi mu buzibu, amaiso gali kuunafugha olw'enaku era zeenazeena mpweireiremu irala amaani.

¹⁰ Obulamu bwange buseeneine olw'enaku n'emyaka gyange gyakendeera olw'okusinda. Amaani gampwamu olw'ebiinuma ku mwoyo, n'amagumba gaanafugha.

¹¹ Abazigu bange boonaboona bambona nga ndi kiwooboloolo; ab'oku muliinaano baaneenhinhata; bakagwa bange bantya era abambona mu nguudo baanumuka.

¹² Abantu nabava ira mu birowoozo ndi oti n'eyafa, nfuuse ng'oti n'ensuwa emaniangwike ye baswire ere.

¹³ Bwenebwene mpulira abantu kamaala nga boogera obwama; buli ghe nninga mpulira kutya kwereere nga baneegeyaamu, era nga beekobaana okundhita.

¹⁴ Aye nze neesiga iwe Musengwa Katonda. Era nkyogera nti: “Niiwe Katonda wange.”

¹⁵ Obulamu bwange buli mu ngalo dho; ntoola mu ngalo dh'abazigu bange abankiriga.

¹⁶ Nningaaku n'amaiso ag'ekisa, ondokole olw'okugonza kwo okutakoma.

¹⁷ Wo Musengwa Katonda, otandeka ni nswala, kuba niiwe ye nsaba. Abakozi b'ebibi baswaze, baje e magombe nga basiriikiriire.

¹⁸ Sirisa abaguya abo kuba baidhwire okwebona. Boogera bubi ku bantu abatuufu nga babanhoomerera.

¹⁹ Bwenebwene ebirungi biri kamaala, by'oterekeire abo abakutya. Abantu boonaboona babona by'okolera abo abakwesiga.

²⁰ Obagisa gh'oli, waalobera abo ababeekobaana baaloba kubatuukaku. Obakuumira agheekusifu waabawonia ebivumo eby'abazigu baibwe.

²¹ Musengwa Katonda asaakibwe, kuba yangonza inho ebitaloodheka, bwe nali nga neezungulwirwa abazigu era ni baanumba.

²² Mu kutya okungi nadhuuba nti “Oba katyo aminze gh'ali!” Aye bwe namulirira yampulirisa nga ndi kumusaba okumbeera.

²³ Mugonzenga Musengwa Katonda imwe mwenamwena abamusinza, Musengwa Katonda akuuma abo abamwesiga, aye abonereza nga bwe kigwaniire abo abeetwala nga ba ghaigulu.

²⁴ Mwiremu amaani era mugume emyoyo, imwe mwenamwena abasuubirira mu Musengwa Katonda.