Zabbuli 30 - Baibuli Ekibono kya Katonda 2014

Okusaba okw'okusiima

¹ Wo Musengwa Katonda, ndidha kukusaakanga buliidho, kuba wamponia, waalobera abazigu bange okuneeyagaliraku.

² Wo Musengwa Katonda wange, nakulirira okumbeera, era wamponia.

³ Wantoola mu bafu, wandhiriza obulamu, naaloba kuja magombe.

⁴ Musaake Musengwa Katonda imwe mwenamwena abamutya! Mwidhukire Omutukuvu by'akoze mumusiime!

⁵ Kuba obusungu bwe bubaagho kaseera buseera, aye obulungi bwe bubaagho mu bulamu obw'omuntu bwonabwona. Omuntu asobola okulira obwire bwonabwona, ate bwe bukya yaaseka.

⁶ Bwe nali nga ndi bukalamu, naja neekiina nga nkoba nti: “Ezira kirindhugumiza.”

⁷ Iwe olw'obulungi bwo wankuuma naaba mugumu ng'oti lusozi, aye bwe watuuka ku ky'obutenda kuuningaku, naatya inho.

⁸ Wo Musengwa Katonda, nakulirira era naakusaba okumbeera.

⁹ Bwe nfa oganhulwamu ki? Bwe nja e magombe, enkungu erikusaaka? Erikobera abantu obwesigwa bwo?

¹⁰ Wo Musengwa Katonda, mpulira era ongemerwe ekivunika. Wo Musengwa Katonda, mbeera!

¹¹ Onkyukiiza okulira kwange waakufuula kukina, onsibwire ebikaakaati eby'okunakughala wandhidhuza okusangaala.

¹² Olw'ekyo ndidha kukusaakanga n'omwoyo gwange gwonagwona obutasirika. Wo Musengwa Katonda wange, ndidha kukusiimanga ebyanda n'ebyanda.