Zabbuli 29 - Baibuli Ekibono kya Katonda 2014

Amamiro ga Musengwa Katonda gakola ebyewuunhio

¹ Imwe abali mu igulu, musaake Musengwa Katonda, mwatule nga Musengwa Katonda bw'ali ow'ekitiisa era ow'amaani.

² Mwatule muti eriina lya Musengwa Katonda liri n'ekitiisa, musinze Musengwa Katonda ng'aboneike mu butukuvu bwe.

³ Amamiro ga Musengwa Katonda ogawulirira ku maadhi; Katonda ow'ekitiisa abwatuka ng'oti lukuba; Musengwa Katonda awulirwa ku maadhi amangi.

⁴ Amamiro ga Musengwa Katonda gali n'obukumu; amamiro ga Musengwa Katonda gawulikika nga ga buyinza.

⁵ Amamiro ga Musengwa Katonda gamenha emivule; Musengwa Katonda amenha emivule egy'e Lebanoni.

⁶ Atuumya ensozi edh'omu Lebanoni ng'oti nte nto, era yaatuumya Sirioni ng'oti n'embogo enume entototo.

⁷ Amamiro ga Musengwa Katonda gavaamu enimi edh'omuliro edhimyansa.

⁸ Amamiro ga Musengwa Katonda gatengeesa eirungu; Musengwa Katonda atengeesa eirungu ery'e Kadeshi.

⁹ Amamiro ga Musengwa Katonda gatengeesa emiti emikologho, era gaakunkumusa amakaba okuva ku miti gyonagyona, n'abali mu isinzizo lye boonaboona baayasiikana bati: “Katonda wa kitiisa!”

¹⁰ Musengwa Katonda n'afuga omwidhuzo gw'amaadhi; afuga nga ni kyabazinga ebyanda n'ebyanda.

¹¹ Musengwa Katonda aghenga abantu be amaani, era aghenga abantu be enkabi babe miraala.