Zabbuli 28 - Baibuli Ekibono kya Katonda 2014

Okusaba n'okusaaka

¹ Wo Musengwa Katonda, iwe olubaale mwe neewogoma, nze ndi kukulirira: otaloba kumpulira. Bw'onsiriikirira ndidha kuba ng'oti n'abo abaaja e magombe.

² Ganha owulirise okulira kwange, nga nkusaba okumbeera, era nga nsituliire emikono eri eisinzizo lyo eitukuvu einho.

³ Otantwaliza ghalala n'ababi, n'abo abakozi b'ebibi aboogera obukalamu ni banaibwe, ate nga mu myoyo gyaibwe baidhwire enge.

⁴ Basasulemu ekigwana ebikolwa byaibwe n'ebibi bye bakola. Basasule ekyo ekigwana ebyo byonabyona bye baakola; ekyo ekibagwaniire ky'obe obaghe.

⁵ Olw'okuba banhoomerera ebyo Musengwa Katonda by'akola n'ebyo bye yatonda, aja kubabonereza era abazikirize.

⁶ Musengwa Katonda asaakibwe, kuba yawulira okulira kwange, nga ndi kumusaba.

⁷ Musengwa Katonda n'amaani gange era n'engabo yange, oyo ye neesiga n'omwoyo omulala. Ambeera era yansanhusa, ndidha kumwembera olwembo olw'okumusiima.

⁸ Musengwa Katonda n'amaani g'abantu be, era n'ekisenge ekigumu kyabazinga we ye yasiiga omuzigo mwe yeewogoma.

⁹ Wo Musengwa Katonda, lokola abantu bo, era oghe enkabi abo be weerobozaamu, iwe obenga mwayi waibwe, era obalabirirenga ebyanda n'ebyanda.