Zabbuli 27 - Baibuli Ekibono kya Katonda 2014

Okusaba okw'omuntu eyeesiga Katonda

¹ Musengwa Katonda n'entaala yange emmuliikirira era n'omulokozi wange, kale ni ghazira ye ntya. Musengwa Katonda n'ekisenge ekigumu mwe neewogoma, kale ni ghazira alintiisatiisa.

² Abakozi ab'ebibi bwebaanumba nga bali ng'oti benda kundya bulye, beene abo abazigu bange baja kugangalima ere bagwe.

³ Ni bweririba eigye nga n'erinzingiiza okuunumba, tija kuwuliramu kutya naire. Abazigu bange ni bwebantanulaku olutalo, nze ndidha kuba mugumu.

⁴ Ekintu kirala kiti kye nsaba Musengwa Katonda, kye nhenda kiri kirala nti mbenga mu ndhu ya Musengwa Katonda enaku dhoonadhoona edh'obulamu bwange, okulingirira obulungi bwa Musengwa Katonda, n'okumusaba angalagire;

⁵ kuba mu biseera ebizibu aja kumpa obubudamo, aja kunkuumira mu ndhu ye, ante ghaigulu ku ibaale abazigu ye batatuuka.

⁶ Olwo mbe nga mpangwire abazigu bange abaneezungulwire; olwo nkube emizira nga mpaayo emisengo mu ndhu ye, era nhembere Musengwa Katonda enhembo edhimusaaka.

⁷ Wo Musengwa Katonda, otansiriikirira nga ndi kulira! Nsaasira ondhiremu!

⁸ Wankoba oti: “Idha onsinze.” Mpegaano nze nkoba nti: “Musengwa Katonda, ndidhie okukusinza

⁹ otaneegisaaku.” Otansungughalira nze omugheereza wo, otaaminga mu maiso go. Niiwe omubeezi wange. Otansuula ere na kundekulira agho, Katonda wange iwe obulokozi bwange.

¹⁰ Waire bbaaba ni maama bandekulira agho, Musengwa Katonda ananzaala.

¹¹ Wo Musengwa Katonda, ngalagira bwe mbe neebise, era ombise mu ngira entuufu, kuba ndi n'abazigu.

¹² Otandekulira agho bazigu kunkola kye benda, kuba abaguya abo baanumbye era bali kuneesoomera okunkankada.

¹³ Aye nze nkakasa bukalamu nti ndibona nga Musengwa Katonda bw'ali omulungi: nga nkaali ku nsi mu bulamu buno.

¹⁴ Weesige Musengwa Katonda otawaamu maani, guma omwoyo. Bwenebwene weesige Musengwa Katonda.