Zabbuli 26 - Baibuli Ekibono kya Katonda 2014

Okusaba okw'omuntu aziraku musango gwonagwona

¹ Wo Musengwa Katonda, sala omusango oyoleke nga bwe nziraku kinvunaanibwa, kuba mbairenga mwesigwa y'oli, aghazira kudaaliima naire.

² Wo Musengwa Katonda, neekebeedha era ondebe; lingirira omwoyo gwange n'ebidhuubo byange,

³ kuba okugonza kwo okutakoma n'okunkuuma, era mu bwesigwa bwo mwe ntambulira.

⁴ Tyeyimba mu bantu baguya, era tyereeterezaaku bantu batali beesimbu.

⁵ Tyenda naire kubita na bakozi ba bibi, era neeghala okutyamira mu babi.

⁶ Wo Musengwa Katonda, okumanha nga nziraku musango, nnaabye mu ngalo, era naatambula okwezungulula alutaari nga nkusinza.

⁷ Nja nga nhembera ghaigulu olwembo olw'okukusiima, nga nkobera abantu ebyo by'okola ebyewuninkiriza.

⁸ Wo Musengwa Katonda, ngonza endhu yo mw'oba, n'ekifo ekitiisa kyo ghe kibonekera.

⁹ Otantwaliza ghalala n'aboonooni, oba okusaaniagho obulamu bwange aghalala n'abatemo,

¹⁰ abayiiya okukola ebibi buli kaseera, era abaidhwire enguzi.

¹¹ Aye nze atambulira mu bwesigwa, nsaasira era onnunule.

¹² Nhemereire aghatuufu, ndidha kusaakanga Musengwa Katonda nga ndi mu bantu be abeesoloiza okumusinza.