Zabbuli 25 - Baibuli Ekibono kya Katonda 2014

Okusaba okugalagirwa n'okuyambibwa

¹ Wo Musengwa Katonda, niiwe ye nsaba.

² Katonda wange, niiwe ye neesiga, mponia okuswala otaganha bazigu bange kuneeyagaliraku.

³ Bwene otaganha abo abasuubirira mu iwe kuswala, aye abo ab'empwitu abakudheemera, ka baswale.

⁴ Wo Musengwa Katonda, mmanhisa bw'oyenda neebise, era ndhegeresa okutambula nga bw'oyenda ntambule.

⁵ Ndagirira era ondhegerese okutambulira mu mazima go, kuba niiwe Katonda era omulokozi wange mwe nsuubirira buliidho.

⁶ Wo Musengwa Katonda, oteerabira nga bw'obairenga ng'otusaasira era ng'otugonza inho, okuva eira n'eira.

⁷ Otaidhukira bibi byange na bisobyo byange eby'omu, buto aye olw'okugonza kwo okungi, n'olw'obulungi obw'eriina lyo, nze ondidhukiranga.

⁸ Olw'okuba Musengwa Katonda mulungi era nga mutuufu, kyava n'agalagira aboonooni engira.

⁹ Abateekudumbaza abalagirira mu kusalagho okutuufu, era abamanhisa by'ayenda.

¹⁰ Okugonza kwa Musengwa Katonda okungi n'obwesigwa bwe, byeyolekera mu nsambo y'atwalamu abo abakuuma endagaano ye era ni bagondera ebiragiro bye.

¹¹ Wo Musengwa Katonda, ku lw'obulungi obw'eriina lyo nsonigha ebibi byange, kuba biri kamaala inho.

¹² Omuntu oyo atya Musengwa Katonda, Musengwa Katonda alimulagirira engira entuufu okugema.

¹³ Mwene anaabanga n'ebirungi kamaala, ate abaana be n'abaidhukulu balitwala ensi.

¹⁴ Musengwa Katonda aba mukagwa w'abo abamutya, era akakasa endagaano ye nabo.

¹⁵ Amaiso gange ngata ku Musengwa Katonda buliidho, kuba n'anteekuluza mu lutuula olw'omuzigu wange.

¹⁶ Wo Musengwa Katonda, otankuba nkoone aye nkusaba ondhune, kuba nsigaire zenka era ndaazibwadaazibwa.

¹⁷ Obweraliikirivu buneeyongeireku ku mwoyo, ntoola mu kudaazibwadaazibwa kuno.

¹⁸ Lingirira okudaazibwadaazibwa kwange n'obuzibu bwe ndimu, onsonighe ebibi byange byonabyona.

¹⁹ Lingirira obungi obw'abazigu bange era obone nga bwe baneeguguna nga benda bwa kundhita

²⁰ Kuuma obulamu bwange era omponie, kuba niiwe ye neesiga, otandeka kuswala!

²¹ Wo Musengwa Katonda, nkusaba obwesigwa n'obutuukirivu binkuumenga, kuba eisuubi lyange liri mu iwe.

²² Wo Katonda wange, nunula Abaisiraeli abantu bo, obatoole mu bizibu byaibwe byonabyona.